სუდანში საქართველოს 30-მდე მოქალაქე იმყოფება. ყველა მათგანი მუშაობს ორ ავიაკომპანიაში, რომელიც ხართუმიდან ასრულებდა ფრენებს.
ავიაკომპანია Geo Sky-ის გენერალური დირექტორის, შალვა კიკნაძის განცხადებით, სუდანის დედაქალაქ ხართუმში მყოფი 30-მდე ქართველიდან 20 კომპანიის თანამშრომელია. ამის შესახებ შალვა კიკნაძე საქართველოს პირველ არხს ესაუბრა.
მისი თქმით, სუდანში იმყოფებიან ავიაკომპანიის მფრინავები, ბორტგამცილებლები და ინჟინრები. კიკნაძის თქმით, ისინი უსაფრთხოდ არიან და ოჯახის წევრებთან მუდმივი კონტაქტი აქვთ.
„ცოტა ხნის წინ წყლითა და საკვებით მოვამარაგეთ. რა თქმა უნდა, საგარეო საქმეთა სამინისტრო ჩართულია თავის პარტნიორ ქვეყნებთან ერთად, ასევე გაერო-ს მისია და ყველა ერთად ველოდებით მხარეებს შორის შეთანხმებას, რომ მოხდეს უსაფრთხო დერეფნის უზრუნველყოფა, შემდგომში ჩვენი თანამშრომლების ევაკუაციის მიზნით. მათთან მუდმივი კონტაქტი გვაქვს. აქვთ ინტერნეტი და მუდმივ კავშირზე არიან ოჯახის წევრებთანაც. არ გადიან სახლებიდან, ერიდებიან ფანჯარასთან ან აივანზე გასვლას. ძირითადად, ყველანი არიან ერთად. ჩემი ინფორმაციით, ეს შეტაკებები მასშტაბურია. შეიძლება ითქვას, შეტაკებები მათგან დაახლოებით 2 კილომეტრის რადიუსში ხდება“, – აღნიშნა კიკნაძემ.
მისივე ინფორმაციით, სუდანში მყოფი საქართველოს კიდევ 10 მოქალაქე მეორე ავიაკომპანიის, MyWay Airlines-ის თანამშრომლები არიან და კავშირი მათთანაც აქვთ.
16 აპრილის ღამეს სუდანში გასამხედროებულ დაჯგუფება "სწრაფი რეაგირების ძალებსა" და ქვეყნის რეგულარულ არმიას შორის დაპირისპირება დაიწყო. სუდანის არმიამ დედაქალაქის მიმდებარედ, ომდურმანში, საჰაერო დარტყმები განახორციელა "სწრაფი რეაგირების ძალების" ბაზებზე.
BBC სუდანის ექიმთა კავშირის ცნობებზე დაყრდნობით წერს, რომ დაღუპულია 100 მშვიდობიანი მოქალაქე.
