დღეს, ბათუმში, „ერთიანი ნაციონალური მოძრაობის“ საკრებულოს წევრმა რეზო ხარაზმა და აჭარის უმაღლესი საბჭოს წევრმა, ლევან ანთაძემ ბრიფინგი გამართეს, სადაც ბათუმის ინფრასტრუქტურულ პრობლემებზე და დაუსრულებელ პროექტებზე ისაუბრეს.
მათი თქმით, ბათუმი ტურისტულ სეზონს მოუმზადებელი ხვდება და საზოგადოებას მოუწოდეს, რომ ისაუბრონ ხმამაღლა, ღიად ამ პრობლემებზე.
„ის, რაც დღეს აჭარაში ხდება, ამაზე პასუხისმგებელი არის აჭარის მთავრობის თავმდჯომარე და მოვითხოვთ ბათუმის მერის იმპიჩმენტს. ბათუმში ინფრასტრუქტურული პროექტები არის დროში გაჭიანურებული და ქალაქი მოუწესრიგებელი ხვდება ტურისტურ სეზონს“, - განაცხადა „ერთიანი ნაციონალური მოძრაობის“, აჭარის უმაღლესი საბჭოს წევრმა, ლევან ანთაძემ.
„ნაციონალური მოძრაობის“ წევრების თქმით, განადგურებულია ქალაქის ტურისტული ინფრასტრუქტურის ნაწილი.
„დღეს ბათუმში არის უმძიმესი მდგომარეობა ინფრასტრუქტურის თვალსაზრისით. ქალაქი დაემსგავსა მიტოვებულ ქალაქს. პრაქტიკულად, არ არსებობს ქუჩა, გზა, სადაც დაწყებული ინფრასტრუქტურის სამუშაო ბოლომდე მისულიყო და ნორმალურად რამე გაკეთებულიყო. ტურისტულ ინფრასტრუქტურაზე შეიძლება ითქვას, რომ განადგურებულია ქალაქის ტურისტული ინფრასტრუქტურის ნაწილი. პრაქტიკულად, ზღვის მიერ წაღებული სანაპიროს ნაწილი დღემდე არ არის მისი რეაბილიტაცია დაწყებული , მხოლოდ ინერტული მასალის შეტანა ხდება, რაც არ არის საკმარისი და საპლაჟო ინფრასტრუქტურით მოუმზადებელი ხვდება ბათუმი. უბნებში, სადაც ინფრასტრუქტურის სამუშაო დაწყებულია, რეალურად ვერ ესწრება, როგორიცაა მაგალითად, ბაგრატიონის ქუჩის რეაბილიტაცია. ასევე დროში არის გაწელილი გმირთა ხეივნის რეაბილიტაცია, სადა 23 მილიონი იხარჯება და ეს სამუშაოებიც გაურკვეველი დროით მიმდინარეობს, რომელიც უკვე უნდა იყოს დასრულებული. ამის პარალელურად კი, ჩვენ ვხედავთ ფრიდონ ხალვაშის ქუჩის რეაბილიტაცია, რომელიც ასევე ვადებში ვერ ემთხვევა და დროში გაიწელა. გონიო-კვარიათში მთელი სანაპირო არის სანაგვედ ქცეული, ამის პარალელურად კი თორნიკე რიჟვაძე და ქალაქის ე.წ მერი, ჩიქოვანი იკრიბებიან და თათბირს ატარებენ ამ ყველაფერზე. რეალურად, დღეს ბათუმელებმა უნდა აიღონ ინიციატივა ხელში და ეს ინიციატივა უნდა იყოს ის, რომ ჩვენ, საზოგადოებამ ერთად უბნებში, კორპუსებში თავიანთი პრობლემების შესახებ ღიად, ხმამაღლა უნდა დაიწყოს საუბარი, მოგვაწოდონ ინფორმაცია და ჩვენ, „ერთიანი ნაციონალური მოძრაობის“ გუნდი აქტიურად დავიწყებთ მუშაობას, რომ „ქართული ოცნება“ ვაიძულოთ დაიწყონ ამ პრობლემების მოგვარება უმოკლეს დროში“. - განაცხადა რეზო ხარაზმა.
