კოჯორში, იუნკერთა მემორიალთან ევროპული საქართველოს ლიდერები და წევრები იმყოფებოდნენ, მათ გმირთა მემორიალს პატივი მიაგეს.
„102 წლის წინ ამ ადამიანების მიერ, საქართველოს მიერ გაწეული მსხვერპლი სამწუხაროდ არ აღმოჩნდა საკმარისი იმისთვის, რომ ჩვენ სახელმწიფოებრიობა შეგვენარჩუნებინა და შემგდგომში თაობებს მოუწიათ, ჭაობში, რეპრესიებსა და სისხლში ცხოვრება. ამ ადამიანების მსხვერპლმა მოგვცა ჩვენ მორალური საყრდენი, რომ თავისუფლება აღგვედგინა და გვაძლევს საყრდენს მომავლისთვის. მაშინ, როცა ამ ხალხმა თავიანთი სიცოცხლე შესწირეს ჩვენს სამშობლოს, გეოპოლიტიკური ვითარება არ იყო ჩვენთვის სასარგებლო და ტრაგედიის მთავარი მიზეზიც ეს იყო.
დღეს იცვლება ეს ვითარება ჩვენი ქვეყნის მომავლის სასარგებლოდ, მათი ხსოვნა და ჩვენი მომავლის საფუძველი უნდა გახდეს დღეს საქართველოს მიერ გაკეთებული არჩევანი. ჩვენ ვალდებულნი ვართ მათი ხსოვნისა და მომავლის წინაშე, რომ ახლა ეს ვითარება გამოვიყენოთ ჩვენი ქვეყნის თავისუფლების განსამტკიცებლად და თავისუფლების სამშვიდობოს გასასვლელად“ - განაცხადა გიგა ბოკერიამ
„102 წლის წინ ამ ქვეყანაში გაანადგურეს ამ ქვეყნის პოლიტიკური, სამხედრო, სასულიერო და კულტურული ელიტა. ეს რომ არ მომხდარიყო და არ ყოფილიყო 25 თებერვალი, მე მგონია, რომ ათჯერ უფრო თავისუფალ, უსაფრთხო და მდიდარ ქვეყანაში ვიცხოვრებდით, ხალხი იცხოვრებდა ისე ღირსეულად, როგორც ნებისმიერ საშუალო სტატისტიკურ ევროპულ ქვეყანაში. აქედან გამომდინარე კარგად უნდა გვახსოვდეს ეს ისტორიის გაკვეთილი, თუ რამდენად დიდი საფრთხე არის ამ ქვეყნისთვის ერთი მხრივ მტერთან კოლაბორაციონიზმი და მეორე მხრივ ოკუპაცია. ასევე უნდა გვახსოვდეს, რომ ეს ისტორიული შანსი არ უნდა გავუშვათ ხელიდან კვლავ და კარგად გამოვიყენოთ ეს შანსი, რომ ვიყოთ დასავლური ცივილიზაციის ნაწილი და დავბრუნდეთ ამ სამყაროში. ეს არის ჩვენი მთავარი გამოწვევა, რასაც 25 თებერვლის ისტორიის გაკვეთილი გვასწავლის“ - განაცხადა გიორგი ნონიაშვილმა
