გერმანიის ყოფილმა კანცლერმა გერჰარდ შრიოდერმა სარჩელი შეიტანა გერმანიის პარლამენტის ქვედა პალატის, ბუნდესტაგის წინააღმდეგ, მაისში ჩამორთმეული პრივილეგების აღდგენის მოთხოვნით.
შრიოდერი ითხოვს ყოფილი კანცლერის ოფისისა და პერსონალის აღდგენას.
ადვოკატების განცხადებით, შრიოდერის სახელით სარჩევლი შევიდა ბერლინის ადმინისტრაციულ საქმეთა სასამართლოში.
"ბუნდესტაგის საბიუჯეტო კომიტეტის გადაწყვეტილება შრედერისთვის ბიუროს ჩამორთმევის შესახებ უკანონოა", - ირწმუნებიან ადვოკატები.
მაისში ცნობილი გახდა, რომ ბუნდესტაგში მმართველმა კოალიციამ მიაღწია შეთანხმებას 78 წლის შრიოდერის ბიუროს დახურვაზე. საბიუჯეტო კომიტეტის განმარტებით, ყოფილი კანცლერებისთვის სპეციალური პრივილეგიები განსაზღვრული იქნება არა მათი სტატუსით, არამედ ნაკისრი ვალდებულებების შესრულებით.
ყოფილ კანცლერს პენსია და დაცვა შეუნარჩუნდა. მედიის შეფასებით, შრიოდერის პერსონალის ხარჯები წელიწადში დაახლოებით 400 ათასი ევრო იყო. გასულ წელს მის ოფისში ხუთი თანამშრომელი მუშაობდა, ოფისის ხელმძღვანელი კი თვეში 10 ათას ევროზე მეტს იღებდა
2022 წლის მარტში ზოგიერთმა თანამშრომელმა უარი თქვა ყოფილ კანცლერთან მუშაობაზე რუსეთის მიმართ მისი პოზიციის პროტესტის ნიშნად.
გერმანიაში შრიოდერს მწვავედ აკრიტიკებენ იმის გამო, რომ მან უარი თქვა პუტინისგან დისტანცირებასა და რუსეთის უკრაინაში შეჭრის ცალსახად დაგმობაზე.
2022 წლის მაისში, შრიოდერმა "როსნეფტ"-ის დირექტორთა საბჭო დატოვა, რადგან არსებობდა საფრთხე, რომ შესაძლოა, დასავლეთის სანქციების ქვეშ მოქცეულიყო. ოდნავ მოგვიანებით, სავარაუდოდ იგივე მიზეზით, მან უარი თქვა "გაზპრომის" დირექტორთა საბჭოს წევრობაზეც.
The New York Times-ის ცნობით, რუსულ ენერგეტიკულ კომპანიებში მუშაობისთვის ყოფილი კანცლერი წელიწადში დაახლოებით მილიონ ევროს იღებდა.
გერჰარდ შრიოდერი გერმანიის კანცლერის პოსტს 1998-2005 წლებში იკავებდა. 2006 წლიდან ის ხელმძღვანელობდა გაზსადენ „ჩრდილოეთ ნაკადი 2“-ის ოპერატორ Nord Stream AG-ის აქციონერთა კომიტეტს.
2007 წლიდან შროდერი ხელმძღვანელობდა „როსნეფტის“ დირექტორთა საბჭოს. ყოფილ კანცლერს მკაცრად აკრიტიკებდნენ იმის გამო, რომ მან „როსნეფტი“ უკრაინაში რუსეთის სასტიკი შეჭრის შემდეგ დაუყოვნებლივ არ დატოვა.
