ყახაზეთი სწავლობს ნავთობის მიწოდების შესაძლებლობას აზერბაიჯანის გავლით, ხოლო ყაზახური სახელმწიფო კომპანია KazMunayGas-ი აწარმოებს წინასწარ მოლაპარაკებებს აზერბაიჯანულ SOCAR-თან. იტყობინება Reuters-ი.
საუბარია ბაქო-თბილისი-ჯეიჰანის მილსადენით, ყაზახეთში წარმოებული 1.5 მილიონი ტონა ნავთობის გადატუმბვაზე თურქეთის ხმელთაშუა ზღვის ჯეიჰანის პორტამდე.
Reuters-ის წყაროს ცნობით, მხარეები შეთანხმებას სავარაუდოდ აგვისტოს ბოლოს მიაღწევენ, რის შემდეგაც, ერთ თვეში დაიწყება მილსადენის ნავთობით დატვირთვა.
ამასთან, სააგენტო აღნიშნავს, რომ ამ მარშრუტით დღეში 30 000 ბარელი ნავთობის მიწოდება უმნიშვნელო იქნება იმ 1.3-1.4 მილიონ ბარელთან შედარებით, რომელსაც ყაზახეთი მსოფლიო ბაზარს აწვდის "კასპიის მილსადენის კონსორციუმის" მეშვეობით.
ამავდროულად, Reuters-ის წყაროები იტყობინებიან, რომ 2023 წელს ყაზახეთიდან იგეგმება წელიწადში კიდევ 3.5 მილიონი ტონა ყაზახური ნედლი ნავთობის ტრანზიტი აზერბაიჯანული მილსადენით საქართველოს შავი ზღვის სუფსის პორტამდე.
ორივე მარშრუტს დღეში 100 000 ბარელზე მეტი ნავთობის გადატუმბვა შეუძლია.
ყახაზეთმა ნავთობის მიწოდების ალტერნატიული გზების ძიება მას შემდეგ დაიწყო, რაც რუსეთმა „კასპიის მილსადენის კონსორციუმის“ წინააღმდეგ დაბრკოლებების შექმნა დაიწყო. თვის დასაწყისში, ნოვოროსიისკის სასამართლომ მილსადენის ექსპლუატაცია 30 დღითაც კი შეაჩერა, ვითომდა გარემოსდაცვითი დარღვევების აღმოჩენის გამო. ერთ კვირაში, საქმიანობის შეჩერება ჯარიმით შეიცვალა.
2022 წელს ყაზახეთი აპირებს დაახლოებით 69 მილიონი ტონა ნავთობის ექსპორტს, რაც 2,1%-ით მეტია გასულ წელთან შედარებით.
ყაზახეთის ნავთობის ექსპორტი შეადგენს მსოფლიო მომარაგების ერთ პროცენტზე მეტს, დაახლოებით 1.4 მილიონ ბარელს დღეში. 20 წლის განმავლობაში ნავთობი მილსადენით იგზავნებოდა რუსეთის შავი ზღვის პორტ ნოვოროსიისკში, რომელიც უზრუნველყოფს გლობალურ ბაზარზე წვდომას.
