ევროკავშირმა უკრაინისთვის დამატებით 500 მლნ ევროს სამხედრო დახმარება დაამტკიცა.
რუსეთის სასტიკი შეჭრის შემდეგ, ევროკავშირის მიერ უკრაინისთვის გამოყოფილი დახმარება 2.5 მილიარდ ევროს მიაღწევს.
"ევროკავშირი კონცენტრირებულია და მტკიცედ უჭერს მხარს უკრაინის თავისუფლებისა და დამოუკიდებლობისთვის ბრძოლას. უკრაინას მეტი იარაღი სჭირდება; ჩვენ მათ მივაწვდით. ამ კონტექსტში, ევროკავშირის წევრი ქვეყნები შეთანხმდნენ 500 მილიონი ევროს ოდენობის სამხედრო დახმარების მეხუთე ტრანშის მობილიზებაზე, რაც ჯამში შეადგენს 2,5 მილიარდ ევროს სამხედრო აღჭურვილობას“, - განაცხადა ევროკავშირის უმაღლესმა წარმომადგენელმა საგარეო პოლიტიკისა და უსაფრთხოების საკითხებში, ჟოზეპ ბორელმა.
უკრაინისთვის ევროკავშირის სამხედრო დახმარება ხორციელდება ევროკავშირის ახალი სამშვიდობო ინსტრუმენტის - ევროპის სამშვიდობო ფონდის (EPF) ფარგლებში.
"ევროპის სამშვიდობო ფონდის (EPF) ფარგლებში ეს ორი დახმარების ღონისძიება მიზნად ისახავს გააძლიეროს ევროკავშირის მხარდაჭერა უკრაინის შეიარაღებული ძალების შესაძლებლობებისა და სიმტკიცის მიმართ, რათა დაიცვას ქვეყნის ტერიტორიული მთლიანობა და სუვერენიტეტი, და დაიცვას მშვიდობიანი მოსახლეობა მიმდინარე რუსული სამხედრო აგრესიისგან“, - ნათქვამია ევროპის საბჭოს განცხადებაში.
Bloomberg-ის ცნობით, ევროპის სამშვიდობო ფონდის ჭერი დაახლოებით 6 მილიარდ დოლარს შეადგენს.
გამოცემის წყაროები აღნიშნავენ, რომ შემოდგომაზე ევროკავშირს მოუწევს გადახედოს, თუ როგორ გააგრძელოს უკრაინის მხარდაჭერა ამ მექანიზმის გამოყენებით.
6-მილიარდიანის ჭერის ამაღლება მოითხოვს კომპლექსურ მოლაპარაკებებს ევროკავშირის წევრებს შორის, მაგრამ ალტერნატივა არის სხვა ქვეყნების პროექტებისთვის გამოყოფილი თანხების შემცირება.
