რუსეთის პრეზიდენტი ვლადიმირ პუტინი ირანს ეწვია - ეს მისი მეორე საგარეო ვიზიტია უკრაინაში ომის დაწყების შემდეგ.
თეირანი ერთ-ერთია მოსკოვის მცირერიცხოვანი მოკავშირეთა შორის საერთაშორისო ასპარეზზე.
პუტინი დაესწრო შეხვედრას ირანის პრეზიდენტ ებრაჰიმ რაისისთან და თურქეთის პრეზიდენტ რეჯებ ტაიპ ერდოღანთან და გამართა ორმხრივი მოლაპარაკებები თითოეულ ლიდერთან. ის ასევე მეხუთედ შეხვდა ირანის უზენაეს სულიერ ლიდერს აიათოლა ალი ხამენეის.
აიათოლა ხამენეიმ პუტინთან შეხვედრისას, ზოგადი განცხადებით დაგმო ომი, თუმცა გააჟღერა ის გზავნილები, რომელიც კრემლის ნარატივს ემთხვევა. ხამენეიმ ომის წამოწყებაში დასავლეთი დაადანაშაულა.
თეირანში პუტინის ვიზიტის ფონზე, რუსეთის "გაზპრომმა" და ირანის ეროვნულმა ნავთობკომპანია NIOC-მა ხელი მოაწერეს ურთიერთგაგების მემორანდუმს და გააფორმეს 40 მილიარდი დოლარის ღირებულების გარიგება, რომელიც, სხვა საკითხებთან ერთად, მოიცავს ორი გაზის და ექვსი ნავთობის საბადოს განვითარებას.
ირანს აქვს ბუნებრივი გაზის მსოფლიოში სიდიდით მეორე მარაგი რუსეთის შემდეგ, მაგრამ აშშ-ს სანქციები ხელს უშლის თეირანს, წვდომა ჰქონდეს წარმოებისთვის საჭირო ახალ ტექნოლოგიებზე და აფერხებს გაზის ექსპორტის განვითარებას.
აიათოლა ალი ხამენეი პუტინთან შეხვედრაზე მოსკოვთან ენერგეტიკული თანამშრომლობის გაძლიერების მოწოდებით გამოვიდა.
ექსპერტები აცხადებენ, რომ ვიზიტი პუტინს შესაძლებლობას მისცემს გააღრმაოს კავშირები ირანთან.
"რუსეთი და ირანი მიჩვეულები არიან სანქციებს", - განაცხადა კრემლის პრესსპიკერმა დმიტრი პესკოვმა ვიზიტის წინა დღეს. "ირანი ათწლეულების განმავლობაში იყო სხვადასხვა სანქციის ქვეშ და ის უკვე კარგად ადაპტირდა ახალ გარემოსთან, თავისი ხალხის კეთილდღეობისა და განვითარებისთვის".
თეირანში ვიზიტის ფარგლებში, პუტინმა, ერდოღანმა და რაისიმ განიხილეს გაჭიანურებული ომი სირიაში, სადაც ირანი და რუსეთი მხარს უჭერენ სირიის პრეზიდენტ ბაშარ ალ-ასადს, ხოლო თურქეთი - მეამბოხე ძალებს.
სამმა ქვეყანამ კიდევ ერთხელ დაადასტურა მათი "გადაწყვეტილება გააგრძელონ მიმდინარე თანამშრომლობა, რათა საბოლოოდ გაანადგურონ ტერორისტული ერთეულები".
ერდოღანმა განაცხადა, რომ ის რუსეთისა და ირანის მხარდაჭერას ელის "ტერორიზმთან ბრძოლაში".
თეთრი სახლის ეროვნული უსაფრთხოების საბჭოს წარმომადგენელმა, ჯონ კირბიმ შეაფასა პუტინის ვიზიტი და თქვა, რომ "რუსეთის პრეზიდენტის ირანში ვიზიტი აჩვენებს, თუ რამდენად იზოლირებული გახდა რუსეთი უკრაინაში შეჭრის შემდეგ".
თეირანში გამართული შეხვედრის შემდეგ გავრცელებულ ერთობლივ განცხადებაში ნათქვამია, რომ თურქეთსა და ირანს შორის შემდეგი სამმხრივი სამიტი რუსეთში გაიმართება.
