ევროკავშირის საბჭო ალბანეთისა და ჩრდილოეთ მაკედონიის ბლოკში გაწევრიანების მიზნით მოლაპარაკებების დაწყებას დათანხმდა. აღნიშნულის თაობაზე ევროკავშირის საბჭოს ამჟამინდელი თავმჯდომარე ქვეყნის, ჩეხეთის პრემიერ-მინისტრმა პეტრ ფიალამ განაცხადა.
ფიალას განცხადებით, გადაიდგა კიდევ ერთი მნიშვნელოვანი ნაბიჯი ევროკავშირთან დასავლეთ ბალკანეთის ინტეგრაციისთვის.
„ევროკავშირი საბჭო, ჩეხეთის ხელმძღვანელობით, ახლახან შეთანხმდა, დაიწყოს მოლაპარაკებები ალბანეთთან და ჩრდილოეთ მაკედონიასთან. ჩვენ კიდევ ერთი მნიშვნელოვანი ნაბიჯი გადავდგით ევროკავშირთან დასავლეთ ბალკანეთის დასაახლოებლად. ეს ჩვენი თავმჯდომარეობის დიდი წარმატებაა“, -წერს ჩეხეთის პრემიერ-მინისტრი.
19 ივლისს პეტრ ფიალა ბრიუსელში შეხვდება ალბანეთის და ჩრდილოეთ მაკედონიის პრემიერ-მინისტრებს, ედი რამას და დიმიტარ კოვაჩევსკის.
ევროკავშირში გაწევრიანების თაობაზე ჩრდილოეთ მაკედონიასთან მოლაპარაკებების დაწყება მას შემდეგ გახდა შესაძლებელი, რაც 16 ივლისს, ჩრდილოეთ მაკედონიის პარლამენტმა მხარი დაუჭირა საფრანგეთის შუამავლობით, ბულგარეთთან მიღწეულ შეთანხმებას, რომელიც ითვალისწინებს კონსტიტუციაში ცვლილებების შეტანას ბულგარელების ეთნიკურ უმცირესობად აღიარების მიზნით.
17 ივლისს, ბულგარეთისა და ჩრდილოეთ მაკედონიის საგარეო საქმეთა მინისტრებმა ხელი მოაწერეს ორმხრივ პროტოკოლს საგზაო რუკის განხორციელების შესახებ, რომელაც გზას გაუხსნა სკოპიეს ევროკავშირთან გაწევრიანების მოლაპარაკებების დასაწყებად.
ჩრდილოეთ მაკედონიამ ევროკავშირის წევრობის განაცხადი 2004 წელს წარადგინა, ალბანეთმა - 2009 წელს. წევრობის კანდიდატის სტატუსი ჩრდილოეთ მაკედონიამ 2005 წელს მიიღო, ალბანეთმა - 2014 წელს. ორივე ქვეყანა ნატოს წევრია.
