ესპანეთსა და პორტუგალიაში ანომალიური სიცხის შედეგად დაღუპულთა რაოდენობამ 1000-ს გადააჭარბა. იტყობინება "დოიჩე ველე" საინფორმაციო სააგენტო BNO News-ზე დაყრდნობით.
სააგენტო AFP-ის ცნობით, 17 ივლისს ესპანეთის დედაქალაქ მადრიდში ტემპერატურა 39 გრადუსამდე გაიზარდა. ქვეყნის აღმოსავლეთით დონ ბენიტოში რეკორდული მაჩვენებელი 43,3 გრადუსი დაფიქსირდა.
კატალონიური გაზეთის La Vanguardia-ს ცნობით, 16 ივლისის მდგომარეობით ესპანეთში 360 ადამიანი დაიღუპა. მათ შორის 22 ადამიანი გარდაიცვალა მადრიდის პროვინციაში.
რეკორდული ტემპერატურა - 47 გრადუსი ცელსიუსით, დაფიქსირდა პორტუგალიის ქალაქ პინიანში 14 ივლისს, იტყობინება პორტუგალიის ეროვნული მეტეოროლოგიური სამსახური.
მეტეოროლოგები ხანგრძლივ სიცხეს პროგნოზირებენ
"არსებობს შიში, რომ სიცხე დიდხანს გაგრძელდება (20 დღე ან მეტი) ბევრ რაიონში - პორტუგალიიდან ცენტრალურ საფრანგეთამდე და სამხრეთ-აღმოსავლეთ ევროპის რაიონებში. სიცხის ტალღა შეიძლება გაგრძელდეს ივლისის ბოლომდე", - ამბობს ამერიკული მეტეოროლოგიური სამსახურის AccuWeather-ის უფროსი მეტეოროლოგი ტაილერ როისი.
მისი თქმით, ჰაერის მაღალი ტემპერატურის ტალღები გავრცელდება უნგრეთში, აღმოსავლეთ ხორვატიაში, ბოსნია და ჰერცეგოვინაში, სერბეთში, სამხრეთ რუმინეთში და ჩრდილოეთ ბულგარეთში.
ევროპაში ტყის ხანძრები მძვინვარებს
ექსტრემალური სიცხის ფონზე, ხანძრები მძვინვარებს საფრანგეთში, საბერძნეთში, პორტუგალიასა და ესპანეთში, დაიწვა ათობით კვადრატული კილომეტრი მიწა, ათასობით მოქალაქის, მათ შორის ადგილობრივებისა და ტურისტების ევაკუცია გახდა საჭირო, დაიღუპა რამდენიმე მეხანძრე-მაშველი.
ეს უკვე სიცხის მეორე ტალღაა სამხრეთ-დასავლეთ ევროპაში ბოლო რამდენიმე კვირის განმავლობაში. მეცნიერები ექსტრემალურ ტემპერატურას კლიმატის ცვლილებას უკავშირებენ და გვალვის უფრო ხშირ და ინტენსიურ პერიოდებს პროგნოზირებენ.
დიდ ბრიტანეთში კრიზისული ჯგუფი შეიქმნა
ექსტრემალურ სიცხესთან დაკავშირებით, 16 ივლისს დიდ ბრიტანეთში ეროვნული კრიზისული ჯგუფი შეიქმნა. ეროვნულმა მეტეოროლოგიურმა სამსახურმა თავისი არსებობის ისტორიის მანძილზე პირველად გამოაცხადა საფრთხის "წითელი" დონე ქვეყნის ზოგიერთ ნაწილში.
ლონდონსა და მანჩესტერს შორის ინგლისის დიდ ნაწილზე 40 გრადუს ცელსიუსამდე ტემპერატურაა მოსალოდნელი. წინა რეკორდი 38,7 გრადუსი დაფიქსირდა კემბრიჯში 2019 წელს.
საფრანგეთის რამდენიმე დეპარტამენტში, რომელთა უმეტესობა ატლანტიკის ოკეანის სანაპიროზე მდებარებს, ხელისუფლებამ საფრთხის გაზრდილი დონე გამოაცხადა. 41 გრადუს ცელსიუსამდე სიცხის ტალღა იქ კიდევ რამდენიმე დღეს გაგრძელდება.
გერმანიაში ტემპერატურა შეიძლება 40 გრადუსამდე გაიზარდოს
გერმანიის მეტეოროლოგიური სამსახურის (DWD) ინფორმაციით, ამ კვირაში გერმანიაში ჰაერის ტემპერატურამ შესაძლოა 40 გრადუსამდე მიაღწიოს. პიკს 19 ივლისს ელოდებიან. ქვეყნის ბევრ რაიონში ჰაერის ტემპერატურა დაახლოებით 35 გრადუსამდე მოიმატებს, სამხრეთ-დასავლეთში და დასავლეთში - 39-მდე და შესაძლოა 40 გრადუსამდე, ვარაუდობენ მეტეოროლოგები.
