უკრაინული სამხედრო-სატრანსპორტო თვითმფრინავის An-12 ეკიპაჟის რვავე წევრი დაიღუპა. იტყობინება სააგენტო  AFP სერბეთის თავდაცვის სამინისტროზე დაყრდნობით.

თვითმფრინავი საბერძნეთის ქალაქ კავალასთან ჩამოვარდა.

სამხედრო-სატრანსპორტო თვითმფრინავის მფლობელი კომპანიის, Meridian-ის აღმასრულებელმა დირექტორმა დენის ბოგდანოვიჩმა განაცხადა, რომ ეკიპაჟის ყველა წევრი უკრაინის მოქალაქეა. ამასთან, მან უარი თქვა ბორტზე არსებული ტვირთის შესახებ კომენტარის გაკეთებაზე.

თავის მხრივ, სერბეთის თავდაცვის მინისტრმა ნებოიშა სტეფანოვიჩმა განაცხადა, რომ თვითმფრინავს ბელგრადის დაკვეთით, ბანგლადეშში გადაჰქონდა 11.5 ტონა სერბული იარაღი, მათ შორის საწვრთნელ ნაღმები.

"სამწუხაროდ, ზოგიერთი მედია ვარაუდობს, რომ თვითმფრინავს გადაჰქონდა იარაღი, რომელიც განკუთვნილი იყო უკრაინისთვის, მაგრამ ეს სრულიად სიცრუეა", - ხაზგასმით აღნიშნა მან.

თვითმფრინავი გვიან ღამით საბერძნეთის ჩრდილოეთით, ქალაქ კავალასთან ჩამოვარდა. მედიის ინფორმაციით, საბერძნეთის სამოქალაქო ავიაციამ მიიღო შეტყობინება, რომ თვითმფრინავის ერთ-ერთ ძრავს პრობლემა შეექმნა, რის გამოც საჰაერო ხომალდი სასწრაფო დაშვების ნებართვას ითხოვდა.

საბერძნეთმა ან-12-ს სალონიკის ან კავალის აეროპორტები შესთავაზა. ეკიპაჟმა კავალი აირჩია და დაშვება დაიწყო, რის შემდეგაც მასთან კავშირი გაწყდა. თვითმფრინავი კავალის აეროპორტიდან დასავლეთით, კავალიდან 40 კმ-ში ჩამოვარდა.

თვითმფრინავი ეკუთვნოდა კომპანია Meridian-ს, რომელიც მსოფლიო მასშტაბით ჩარტერულ რეისებს ასრულებს. ასევე, თანამშრომლობს გაეროსა და ნატოს-თან, ტვირთების გადაზიდვისა და სამხედროების გადაყვანის ფარგლებში.