ევროკავშირი რუსული გაზის ჩასანაცვლებლად აზერბაიჯანული გაზის შესყიდვის გაზრდას აპირებს. იტყობინება საერთაშორისო სააგენტო Reuters.
მედიის ცნობით, ამ მიზნით ევროკომისიამ ევროკავშირის ქვეყნებს შესთავაზა, დადონ შეთანხმება ბაქოსთან, რაც გულისხმობს აზერბაიჯანის მიერ გაზის მოპოვების გაფართოებას და მილსადენების ქსელის გაზრდას.
"მხარეები ცდილობენ ხელი შეუწყონ ბუნებრივი აირით ვაჭრობას, მათ შორის ევროკავშირში ექსპორტის გზით, სამხრეთის გაზის დერეფნის გავლით მინიმუმ 20 მილიარდი კუბური მეტრი გაზის ოდენობით ყოველწლიურად 2027 წლამდე", - ციტირებს სააგენტო ურთიერთგაგების მემორანდუმის პროექტს, რომელიც ჯერ კიდევ არ არის დამტკიცებული ევროკავშირის წევრი ქვეყნების მთავრობების მიერ.
დოკუმენტში აღნიშნულია "გრძელვადიანი, პროგნოზირებადი და სტაბილური კონტრაქტების" მნიშვნელობა და ნათქვამია, რომ ისინი უნდა შეესაბამებოდეს ევროკავშირის პოლიტიკას კლიმატის ცვლილებთან დაკავშირებით. ბრიუსელის განცხადებით, ეს მოითხოვს გაზის მოხმარების მკვეთრ შემცირებას, განსაკუთრებით 2030 წლის შემდეგ.
გასულ წელს ევროპის ქვეყნებმა ტრანსადრიატიკის გაზსადენით (სამხრეთის გაზის დერეფნის მილსადენის ქსელის მონაკვეთი) 8 მილიარდ კუბურ მეტრზე მეტი აზერბაიჯანული გაზი მიიღეს.
