ყაზახეთის პრეზიდენტმა ყასიმ-ჟომართ თოყაევმა მთავრობას დაავალა უცხოური კომპანიების მოზიდვა ქვეყანაში, რომლებმაც რუსული ბაზარი უკრაინაში გაჩაღებული ომის გამო დატოვეს.
"ყოველი მეორე თითქმის 1400 მსხვილი უცხოური კომპანიიდან წყვეტს თავს საქმიანობას ან მთლიანად ტოვებს რუსეთის ბაზარს. მთავრობამ უნდა შექმნას ხელსაყრელი პირობები მათი ყახაზეთში მოზიდვისთვის", - ციტირებს ყაზახური გამოცემა პრეზიდენტის სიტყვებს.
უკრაინაში გაჩაღებული ომის გამო, რუსეთი 200-ზე მეტმა მსხვილმა კომპანიამ დატოვა, მათ შორის Universal Pictures, Cisco, IBM, Coca-Cola Company, Lego, Electrolux და სხვა.
28 ივნისს, ყაზახეთის ციფრული განვითარებისა და ინოვაციების მინისტრმა განაცხადა, რომ ქვეყანამ უზარმაზარი სამუშაო გასწია უცხოური IT კომპანიების მოსაზიდად. მისივე თქმით, არაერთი ასეთი კომპანია უკვე გადავიდა ყაზახეთში.
17 ივნისს ყაზახეთის პრეზიდენტმა ყასიმ-ჟომართ თოყაევმა, პეტერბურგის საერთაშორისო ეკონომიკურ ფორუმზე გამოსვლისას, რუსეთის პრეზიდენ პუტინის თანდასწრებით, დონბასის თვითგამოცხადებულ რესპუბლიკებს კვაზისახელმწიფოები უწოდა და თქვა, რომ ყაზახეთი მათ არასოდეს აღიარებს.
ამავდროულად, მან განაცხადა, რომ ყაზახეთი რუსეთს დასავლეთის მიერ დაწესებული სანქციების გვერდის ავლაში არ დაეხმარება.
"სანქციები არის სანქციები და ისინი არ უნდა დავარღვიოთ, მით უფრო მათი დარღვევის შემთხვევაში, მოსალოდნელია ე.წ. მეორადი სანქციები, რომლებიც ჩვენს ეკონომიკას ძირს გამოუთხრის", - თქვა თოყაევმა რუსული ტელეარხის ეთერში.
