გაერთიანებული სამეფოს მმართველი კონსერვატიული პარტიის ლიდერისა და პრემიერ-მინისტრის პოსტზე 8 კანდიდატია ნომინირებული.
კანდიდატების წარდგენის ვადა 12 ივლისს, ლონდონის დროით 18:00 საათზე ამოიწურა.
კანდიდატები დაასახელა კონსერვატიული პარტიის "1922 წლის კომიტეტმა", რომელიც არჩევნების ორგანიზებაზეა პასუხისმგებელი. ნომინირებულთა სიაში მოსახვედრად, კანდიდატს პარტიიდან სულ მცირე 20 დეპუტატის მხარდაჭერა უნდა მიეღო.
კემი ბადენოჩი - ადგილობრივი თვითმმართველობის საკითხთა მინისტრი
სუელა ბრეივერმანი - ინგლისისა და უელსის გენერალური პროკურორი
ჯერემი ჰანტი - თემთა პალატის ჯანმრთელობისა და სოციალური დაცვის კომიტეტის თავმჯდომარე
პენი მორდაუნტი - ყოფილი თავდაცვის მდივანი
რიში სუნაკი - ყოფილი ხაზინის (ფინანსთა) მდივანი
ლიზ ტრასი - საგარეო საქმეთა მდივანი
ტომ ტუგენდატი - თემთა პალატის საგარეო საქმეთა კომიტეტის თავმჯდომარე
ნადიმ ზაჰავი - მოქმედი ხაზინის (ფინანსთა) მდივანი.
ნომინირებულთა საბოლოო სიის გამოცხადებამდე, საკუთარი კანდიდატურები მოხსნეს საჯიდ ჯავიდმა და რეჰმან ჩიშტიმ.
პარტიის ლიდერობის კანდიდატების პირველი კენჭისყრა 12 ივლისს არის დაგეგმილი. მანამდე თემთა პალატის სხდომაზე თითოეული ნომინანტი სიტყვით გამოვა, რისთვისაც 12-12 წუთი დაეთმობათ.
შეგახსენებთ, 7 ივლისს ბრიტანეთის პრემიერ-მინისტრმა ბორის ჯონსონმა კონსერვატიული პარტიის ლიდერის თანამდებობა დატოვა. ჯონსონი პრემიერ-მინისტრის მოვალეობის შესრულებას განაგრძობს, ვიდრე კონსერვატიული პარტია ახალ ლიდერს არ აირჩევს.
