NASA-მ, ამერიკის აერონავტიკისა და კოსმოსის ადმინისტრაციამ გამოაქვეყნა ტელესკოპ James Webb-ის მიერ გადაღებული სრულყოფილი ფერადი ფოტოების მორიგი სერია.

კოსმოსური ადმინისტრაციის ცნობით, ტელესკოპმა გადაიღო სამყაროს ყველაზე ღრმა და მკვეთი ფოტოები ინფრაწითელი გამოსახულების სახით, უმაღლესი გარჩევადობით.

ეგზოპლანეტა WASP-96b

სამხრეთის ბეჭდისებრი ნისლეული

გალაქტიკათა ჯგუფი სტეფანის კვინტეტი

გემის ხერხემლის ნისლეული

მანამდე, ტელესკოპის გადაღებულ პირველი სრულყოფილი ფოტო თეთრ სახლში გამართულ სპეციალურ ბრიფინგზე ამერიკის შეერთებული შტატების პრეზიდენტმა, ჯო ბაიდენმა, ვიცე-პრეზიდენტმა კამალა ჰარისმა და NASA-ს ხელმძღვანელმა ბილ ნელსონმა წარადგინეს.

ტელესკოპი James Webb-ი კოსმოსში გასული წლის ბოლოს გაუშვეს.

NASA-მ ტელესკოპის პროექტზე მუშაობა 1980-იანი წლების ბოლოს დაიწყო. მასზე დაახლოებით 10 მილიარდი დოლარი დაიხარჯა. NASA-სთან ერთად ტელესკოპის შექმნაზე, კანადის კოსმოსური სააგენტო (CSA) და ევროპის კოსმოსური სააგენტო (ESA) მუშაობდნენ.

ტელესკოპი ზომითა და ტექნიკური აღჭურვილობით მრავალჯერ აღემატება მის წინამორბედს, სახელგანთქმულ ჰაბლის ტელესკოპს. ის მკვლევარებს საშუალებას მისცემს დაინახონ სამყაროს შორეული წარსული, პირველი გალაქტიკების და პირველი ვარსკვლავების ფორმირება.

James Webb-ის ერთ-ერთი უპირატესობა არის ინფრაწითელ და ოპტიკურ დიაპაზონში მუშაობის შესაძლებლობა, რაც კიდევ უფრო ფართო შესაძლებლობას იძლევა შორეული გალაქტიკების შესწავლისა. ექსპერტების თქმით, მას შეუძლია მთლიანად შეცვალოს ჩვენი გაგება კოსმოსის შესახებ.