შეერთებული შტატების კონგრესის წარმომადგენელთა პალატის რესპუბლიკელი წევრი, წარმოშობით უკრაინელი ვიქტორია სპარცი უკრაინის პრეზიდენტის ადმინისტრაციის ხელმძღვანელ ანდრეი ერმაკს გადადგომისკენ მოუწოდებს.
სპარცის მტკიცებით, ამერიკსა და ევროპაში დიდი ხანია "სერიოზული ეჭვები აქვთ" ერმაკთან მიმართებაში. მისივე თქმით, ერმაკი ჭეშმარიტი სახელმწიფო მოხელე რომ ყოფილიყო, ჯერ კიდევ ზამთარში გადადგებოდა, რადგან მაშინ უკრაინის ხელისუფლებას არწმუნებდა, რომ რუსეთი თავდასხმას არ განახორციელებდა.
"ბევრი ამერიკელი და ევროპელი უკვე დიდი ხანია, სერიოზული შეშფოთებას გამოთქვამს ერმაკთან დაკავშირებით. ერმაკი რომ სახელმწიფო მოხელე ყოფილიყო, როგორც ადამიანი ასეთი საეჭვო რეპუტაციის, ის ჯერ კიდევ ზამთარში დატოვებდა თანამდებობას. მაშინ, როცა უკრაინის მთავრობას არწმუნებდა, რომ რუსეთის მხრიდან თავდასხმა არ მოხდებოდა, რამაც შეასუსტა უკრაინის მომზადების დონე. თუმცა არასდროსაა გვიანი სწორად მოქცევა", - აღნიშნავს სპარცი ოფიციალურ განცხადებაში.
სპარცის განცხადებით, 24 თებერვლის შემდეგ, 6-ჯერ იმყოფებოდა უკრაინაში და არაერთ სამხედროს შეხვდა.
"გაოცებული ვიყავი სამხედროების შემართებით, მაგრამ აღმოვაჩინე, რომ კიევი, არმიის მხარდაჭერისთვის საერთო ეროვნული ძალისხმევის ნაცვლად, ერმაკის ხელმძღვანელობით პოლიტიკას თამაშობს", - წერს წარმომადგენელთა პალატის წევრი.
ამავდროულად, ვიქტორია სპარცი ანდრეი ერმაკს მის წინააღმდეგ ცილისმწამებლური კამპანიის აგორებაში ადანაშაულებს.
შეგახსენებთ, გასულ კვირას, ვიქტორია სპარცმა ოფიციალური წერილით მიმართა აშშ-ის პრეზიდენტ ჯო ბაიდენს, სადაც ანდრეი ერმაკთან დაკავშირებული ზედამხედველობის პროცედურების შესახებ ინფორმაციის მიღება სთხოვა. სპარცი აცხადებდა, რომ არსებობს ეჭვი ერმაკის რუსეთთან საეჭვო კავშირებზე.
უკრაინის საგარეო საქმეთა სამინისტრომ გააკრიტიკა სპარცის განცხადება ბაიდენისადმი და თქვა, რომ მისი ქმედებები "არის დაუფარავი მცდელობა, დაუბრუნოს ამერიკულ პოლიტიკას კლასიკური რუსული პროპაგანდისტული ნარატივები უკრაინის ხელმძღვანელობასა და რუსეთს შორის სავარაუდო კავშირების შესახებ".
ამავდროულად, კონგრესში უკრაინის მხარდაჭერის ჯგუფის თანათავმჯდომარემ, კონგრესმენმა მარსი კაპტურმა განცხადება გაავრცელა პრეზიდენტ ვოლოდიმირ ზელენსკის მხარდასაჭერად და ვიქტორია სპარცი რუსეთის პრეზიდენტ პუტინის უნებლიე დახმარებაში დაადანაშაულა.
