ლვოვის ადმინისტრაციულმა სააპელაციო სასამართლომ უკრაინის კომუნისტური პარტიის საქმიანობა აკრძალა.
მოსამართლეთა კოლეგიამ ადმინისტრაციული საქმის განხილვა 5 ივლისს დაასრულა. კომუნისტური პარტიის აკრძალვის მოთხოვნით, სასამართლოს უკრაინის იუსტიციის სამინისტრომ მიმართა.
ამავდროულად, სასამართლოს გადაწყვეტილებით პარტიის ქონება სახელმწიფოს საკუთრებაში გადავა.
"სასამართლომ დააკმაყოფილა უკრაინის იუსტიციის სამინისტროს მოთხოვნები: აკრძალულია უკრაინის კომუნისტური პარტიის საქმიანობა; პარტიის, მისი რეგიონული, საქალაქო, რაიონული ორგანიზაციების ქონება და სხვა აქტივები, გადავიდა სახელმწიფოს საკუთრებაში", - წერია სასამართლოს განცხადებაში.
სასამართლოს გადაწყვეტილების სრული ტექსტი მოგვიანებით გამოქვეყნდება.
ამასთან, კომუნისტურ პარტიასთან ერთად, აიკრძალა პარტია „ბედნიერი უკრაინა“.
14 მაისს უკრაინის პრეზიდენტმა ვოლოდიმირ ზელენსკიმ ხელი მოაწერა კანონს, რომელიც კრძალავს პრორუსულ პოლიტიკურ პარტიებს.
