ოპოზიციური პარტიების წარმომადგენლები აშშ-ის სახელმწიფო მდივნის უფროს მრჩეველს დერეკ შოლეს შეხვდნენ. შეხვედრის დასრულების შემდეგ, მედიასთან კომენტარი გააკეთა "სტრატეგია აღმაშენებლის" თავმჯდომარემ, გიორგი ვაშაძემ.
გიორგი ვაშაძის განცხადებით, დერეკ შოლესთან საუბრისას განიხილეს მოსამართლეებისა და ბიძინა ივანიშვილის სანქცირების საკითხები. მისივე თქმით, ამერიკული მხარე ზედმიწევნით არის ინფორმირებული იმის თაობაზე, რაც ხდება საქართველოში.
"იყო საუბარი მოსამართლეების სანქცირებაზე, კლანის წევრი მოსამართლეების და ჩვენ მივაწოდეთ რომ... მეგობრებო, მე გუშინ მქონდა შეხვედრა მოსამართლეებთან, ვერ ვიტყვი საჯაროდ ვისთან, შოკში ვიყავი რაც ახლა ხდება სასამართლოში. ფაქტობრივად ბავშვებზე და ოჯახებზე არიან მისეული სამართალდამცავი უწყებები და ასე აშანტაჟებენ მოსამართლეებს.
რა თქმა უნდა, ნიკა გვარამიას საკითხი გვქონდა და ასევე იყო საუბარი ბიძინა ივანიშვილის სანქცირებასთან დაკავშირებით. ჩვენ ვუთხარით შემდეგი რამ, რომ სადაც არის მტკიცებულება იქ უნდა იყოს კონკრეტული ქმედება და ეს ქმედება არის აუცილებელი თუნდაც სასამართლოს შემთხვევაში. როცა ვამბობთ, რომ კლანია სასამართლოში, მაშინ უნდა მოხდეს, როგორც უკრაინაში, დაიწყეს სანქცირება მოსამართლეების და ამან უშველა იქაურ მართლმსაჯულებას, დაახლოებით, ასე უნდა მოხდეს საქართველოს შემთხვევაშიც. რაც შეეხება ივანიშვილზე იქნება თუ სხვაზე, ბევრ საკითხზე იყო საუბარი, დეტალებში ვერ შევალ, ამისი უფლება არა გვაქვს. თუმცა გულწრფელად ვიტყვი, ანიდან ჰოემდე იციან, რა ხდება საქართველოში. ძალიან კარგად ესმით, რატომ ხდება ეს ყველაფერი. და კიდევ ერთი მნიშვნელოვანი რამ მათი მხრიდან, ამერიკა არის მშვიდობის ერთ-ერთი მთავარი გარანტიც და მომხრეც, რომ საქართველოში იყოს მშვიდობიანი, ოღონდ დასავლური განვითარება", - თქვა ვაშაძემ.
