შეერთებული შტატების უზენაეს სასამართლოს, თავის 233-წლიანი ისტორიის განმავლობაში, პირველი აფროამერიკელი ქალი მოსამართლე ჰყავს მას შემდეგ, რაც სენატმა მოსამართლედ დაამტკიცა პრეზიდენტ ჯო ბაიდენის მიერ წარდგენილი ქეტანჯი ბრაუნ ჯექსონის კანდიდატურა.
ბრაუნ ჯექსონს, სენატში გამართულ კენჭისყრაზე, მხარი 53 სენატორმა დაუჭირა, რომელთა შორის 3 რესპუბლიკელია.
უზენაეს სასამართლოში ვაკანტური თანამდებობა მას შემდეგ გაჩნდა, რაც სასამართლოს ლიბერალური ფრთის წარმომადგენელმა, მოსამართლე სტივენ ბრეიერმა პენსიაში გასვლის თაობაზე განაცხადა. მოსამართლე ბრეიერი პენსიაზე ივნისში გადის.
51 წლის ბრაუ ჯექსონი ამჟამად ის აშშ-ის ფედერალური სააპელაციო სასამართლოს (კოლუმბიის ოლქი) მოსამართლეა. მას აქვს ჰარვარდის უნივერსიტეტის ორი ხარისხი სამართალში. ერთ დროს მუშაობდა ჟურნალ Harvard Law Review-ს რედაქტორად.
უზენაესი სასამართლო 9 მოსამართლისგან შედგება, ისინი თანამდებობაზე სიცოცხლის ბოლომდე რჩებიან.
უმაღლესი სასამართლო გადამწყვეტ როლს ასრულებს ამერიკის საზოგადოებრივ ცხოვრებაში და ხშირად ამბობს საბოლოო სიტყვას უაღრესად სადავო კანონებსა და დავებზე შტატებსა და ფედერალურ მთავრობას შორის.
სტატისტიკური მონაცემების თანახმად, შეერთებული შტატების ფედერალური სისტემის მხოლოდ 3%-ს შეადგენენ შავკანიანი ქალები.
აშშ-ის უზენაეს სასამართლოს მხოლოდ ორი შავკანიანი მოსამართლე ჰყავდა - ორივე მამაკაცი იყო - თურგუდ მარშალი და კლარენს თომასი.
1981 წელს რონალდ რეიგანმა მოსამართლედ დანიშნა პირველი ქალი უზენაესი სასამართლოს ისტორიაში - სანდრა დეი ო’კონორი. 2009 წლის აგვისტოში უზენაესი სასამართლოს წევრად პირველად დანიშნეს ლათინოამერიკული წარმოშობის სონია სოტომაიორი.
