2022 წლის ოსკარების დაჯილდოებაზე მომხდარი ინცინდენტის მეორე დღეს, მსახიობმა უილ სმიტმა კომიკოს კრის როკს ბოდიში მოუხადა. განცხადება უილ სმიტმა სოციალურ ქსელში გამოაქვეყნა.
"ძალადობის ყველა ფორმა არის მომწამვლელი და დამღუპველი. ოსკარის დაჯილდოებაზე ჩემი საქციელი მიუღებელი და მიუტევებელი იყო. ხუმრობა ჩემი საქმის ნაწილია, მაგრამ ჯადას ჯანმრთელობაზე ხუმრობა ვერ ავიტანე და ემოციური რეაგირება მოვახდინე.
მინდა საჯაროდ ბოდიში მოგიხადო, კრის. ზღვარს გადავედი და შევცდი. ძალიან მრცხვენია. ჩემი ქმედება არ შეესაბამება იმ ადამიანისას, რომელიც მინდა ვიწყო. სიყვარულისა და სიკეთს სამყაროში ძალადობის ადგილი არ არის.
ასევე მინდა ბოდიში მოვუხადო აკადემიას, შოუს პროდიუსერებს, დამსწრეებს და მაყურებლებს მთელს მსოფლიოში", - წერს უილ სმიტი
შეგახსენებთ, ოსკარების დაჯილდოებაზე, ერთ-ერთი ნომინაციის წარდგენისას კომიკოსმა კრის როკმა უილ სმიტის ცოლზე, მსახიობ ჯადა პინკეტ სმიტზე იხუმრა, რა დროსაც მის გადაპარსულ თავზე მიანიშნა. ჯადა პინკეტ სმიტს ავტოიმუნური დარღვევა, ალოპეცია აქვს, რის გამოც თმა გასცვივდა. ხუმრობამ გაანაწყენა უილ სმიტი, სცენაზე ავიდა და კომიკოსს სილა გააწნა. სმიტმა თავის ადგილზე დაბრუნების შემდეგ, აუდიტორიიდან რამდენჯერმე ხმამაღლა დაუყვირა კომიკოსს, რომ მისი ცოლის სახელი აღარ ეხსენებინა.
მოგვიანებით, უილ სმიტს საუკეთესო მსახიობი კაცის ნომინაციაში ოსკარი გადაეცა. სამადლობელ სიტყვაში მან ბოდიში მოუხადა კინოაკადემიასა და საზოგადოებას, მაგრამ არა კრის როკს.
