ნიდერლანდების მთავრობის განცხადებით, მიუხედავად კორონავირუსის ახალი შემთხვევების ყოველდღიური მაღალი მაჩვენებლისა, 25 თებერვლიდან ქვეყანაში გაუქმდება ყველა შეზღუდვა, რომელიც მანამდე ვირუსის გავრცელების აღკვეთის მიზნით მოქმედებდა.
"ქვეყანა ხელახლა გაიხსნება", - განაცხადა ნიდერლანდების ჯანდაცვის მინისტრმა ერნსტ კუიპერსმა დღეს გამართულ პრესკონფერენციაზე.
ყველა საჯარო ადგილი - მათ შორის კინოთეატრები, რესტორნები და ბარები - შეძლებენ განაახლონ ნორმალური ფუნქციონირება სრული დატვირთვით, თითქმის ორი წლის განმავლობაში პირველად.
პირბადის და სოციალური დისტანცია აღარ იქნება სავალდებულო უმეტეს ადგილებში, მაგრამ ეს მოთხოვნა კვლავ შენარჩუნდება საზოგადოებრივ ტრანსპორტსა და აეროპორტებში.
მთავრობა მოუწოდებს მოსახლეობას, რომ ჯერჯერობით თავი შეიკავონ ხელის ჩამორთმევისგან, რადგან გასათვალისწინებელია, რომ "ვირუსი არსად გამქრალა". ამავე დროს, ურჩევს მოქალაქეებს, რომ სიმპტომების შემთხვევაში ტესტი ჩაიტარონ.
ჰოლანდიის ზრდასრული მოსახლეობის დაახლოებით 86 პროცენტი სრულად არის ვაქცინირებული, რაც ევროპაში ერთ-ერთი ყველაზე მაღალი მაჩვენებელია.
ნიდერლანდები ერთ-ერთია იმ რამდენიმე ევროპულ ქვეყანას შორის, რომელმაც გადაწყვიტა კოვიდშეზღუდვების გაუქმება დანიის, შვედეთის, ინგლისის და ნორვეგიის შემდეგ.
