რუსეთის ფედერაციის პრეზიდენტი ვლადიმირ პუტინი აცხადებს, რომ რუსეთს ომი არ უნდა.
"იმასთან დაკავშირებით, გვსურს თუ არა ეს [ომი ევროპაში], რა თქმა უნდა, არა! სწორედ ამიტომ წამოვაყენეთ წინადადება მოლაპარაკებათა პროცესის შესახებ, რომლის შედეგებიც უნდა გახდეს შეთანხმება თანაბარი უსაფრთხოების უზრუნველყოფაზე, მათ შორის ჩვენი ქვეყნისთვისაც", - განაცხადა პუტინმა გერმანიის კანცლერ ოლაფ შოლცთან შეხვედრის შემდეგ გამართულ პრესკონფერენციაზე.
გერმანიის კანცლერის სიტყვებზე იმის შესახებ, რომ მას რთულად წარმოუდგენია ომი ევროპაში უკრაინის გარშემო შექმნილ სიტუაციასთან დაკავშირებით, პუტინმა განაცხადა: "მაგრამ ჩვენ ხომ თქვენთან ერთად ვიხილეთ ომი ევროპაში, რომელიც სწორედ ნატო-ს ბლოკმა გააჩაღა იუგოსლავიის წინააღმდეგ. მსხვილი სამხედრო ოპერაცია სარაკეტო დარტყმებით ევროპაში ერთ-ერთი უდიდესი დედაქალაქის - ბელგრადის წინააღმდეგ. ეს ხომ უკვე იყო!".
ამასთან, პუტინმა განაცხდა, რომ ნატო-ს მხრიდან იუგოსლავიის წინააღმდეგ საომარი მოქმედებები გაეროს უსაფრთხოების საბჭოს სანქციების გარეშე ჩატარდა. "ეს ძალიან ცუდი მაგალითია, მაგრამ ხომ იყო", - დასძინა პუტინმა.
