40 წლის სერდარ ბერდიმუჰამედოვი, თურქმენეთის მოქმედი მეთაურის გურბანგული ბერდიმუჰამედოვის ვაჟი, 12 მარტს დაგეგმილ ვადამდელ არჩევნებზე პრეზიდენტობის კანდიდატად წარადგინეს. აღნიშნულის თაობაზე თურქმენული მედია იტყობინება.
გავრცელებული ინფორმაციით, სერდარ ბერდიმუჰამედოვის კანდიდატურა თურქმენეთის მმართველმა დემოკრატიულმა პარტიამ წარადგინა.
თურქმენეთის ცენტრალურმა საარჩევნო კომისიამ წინასაარჩენო კამპანიის დაწყება ოფიციალურად დაწყებულად გამოაცხადა.
თურქმენეთის კონსტიტუციის თანახმად, პრეზიდენტად შეიძლება აირჩეს თურქმენეთში დაბადებული მოქალაქე 40 წლის ასაკიდან, რომელსაც ქვეყანაში უცხოვრია 15 წელს მაინც.
2021 წლის 11 თებერვალს სერდარ ბერდიმუჰამედოვი მამამისმა ვიცე-პრემიერად და უმაღლესი კონტროლის პალატის თავმჯდომარედ დანიშნა.
2022 წლის 11 თებერვალს კი ცნობილი გახდა, რომ თურქმენეთში ვადამდელი საპრეზიდენტო არჩევნები გაიმართებოდა. ამავე დღეს, პრეზიდენტმა გურბანგული ბერდიმუჰამედოვმა პარლამენტის ზედა პალატის სხდომაზე სიტყვით გამოსვლისას განაცხადა, რომ დროა, საპრეზიდენტო პოსტი ახალგაზრდა ლიდერს დაუთმოს.
მედია და პოლიტიკური მიმომხილველები ვარაუდობდნენ, რომ გურბანგული ბერდიმუჰამედოვს საპრეზიდენტო პოსტის თავისი ვაჟისთვის გადაცემა ჰქონდა განზრახული. როგორც აღმოჩნდა, მათი მოლოდინები გამართლდა.
მიუხედავად უზარმაზარი ბუნებრივი რესურსებისა, თურქმენეთი ბოლო წლებია მძიმე ეკონომიკურ კრიზისშია, ძირითადად ბერდიმუჰამედოვის მმართველობის არაეფექტურობის გამო, რომელიც ბოლო 15 წელია საკუთარი პიროვნების კულტის შექმნით არის შეპყრობილი.
ბერდიმუჰამედოვი თურქმენეთის პრეზიდენტად 15 წლის წინ, პირველი პრეზიდენტის საფარმურად ნიაზოვის გარდაცვალების შემდეგ, 2006 წლის დეკემბერში აირჩიეს. 2017 წლის 12 თებერვალს ბერდიმუჰამედოვი აირჩიეს მესამე შვიდწლიანი ვადით, რომელიც 2024 წელს დასრულდება.
დამოუკიდებლობის წლებში თურქმენეთში ჩატარებული არც ერთი არჩევნები არ არის აღიარებული, როგორც თავისუფალი და სამართლიანი.
