შეერთებულმა შტატებმა პოლონეთში F-15 ტიპის მოიერიშეების დამატებითი ჯგუფი გაგზავნა. იტყობინება პოლონეთის თავდაცვის მინისტრი მარიუშ ბლაშაკი.
მინისტრის განცხადებით, 8 გამანადგურებელი უკვე ჩავიდა პოლონეთში. მისივე თქმით, გამანადგურებლები ლასკას საჰაერო ბაზაზე (ლოძის სავოევოდო, პოლონეთის ცენტრალური ნაწილი) განლაგდებიან.
როგორც ბლაშაკი ამბობს, სამხედრო თვითმფრინავები გასულ კვირას ჩამოსულ გამანადგურებლებს შეუერთდებიან.
მოიერიშეების პირველი ჯგუფი შეერთებულმა შტატებმა 11 თებერვალს გაგზავნა. მაშინ არ დაუკონკრეტებიათ, პირველ ეტაპზე რამდენი თვითმფრინავი ჩავიდა პოლონეთში.
ამერიკული მოერიშეები, რომლებიც გაიგზავნა შოტლანდიაში მდებარე ლოსიმუტის ბრიტანული ავიაბაზიდან, იმოქმედებენ პოლონეთისა და დანიის F-16-ის ტიპის თვითმფრინავებთან ერთად. აღნიშნული თვითმფრინავები შეასრულებენ ნატო-ს საჰაერო სივრცის პატრულირების მისიას.
11 თებერვალს გავრცელდა ცნობა, რომ ვაშინგტონმა გერმანიაში განლაგებული F-16-ის ტიპის გამანადგურებლების ნაწილი, "რეგიონული უსაფრთხოების განსამტკიცებლად", რუმინეთში გაგზავნა.
მანამდე, ევროპაში აშშ-ის სამხედრო-საჰაერო ძალებმა განაცხადა, რომ დიდ ბრიტანეთში ფეარფორდის (Fairford) ავაიბაზაზე ჩავიდა B-52H ტიპის სტრატეგიული ბომბდამშენები, რომლებსაც შეუძლიათ ბირთვული იარაღის გადატანა.
