რუსეთის საზღვაო ძალების წყალქვეშა ნავი "დონის როსტოვი" დარდანელისა და ბოსფორის სრუტეების გავლით შავ ზღვაში შევიდა. იტყობინება თურქული სააგენტო "ანადოლუ".

სააგენტოს ცნობით, წყალქვეშა ნავს სრუტის გავლისას თურქეთის სანაპირო დაცვის კატარღები მიაცილებდნენ.

შაბათს, რუსეთმა შავ ზღვაში წვრთნები დაიწყო 30-ზე მეტი რუსული ხომალდის მონაწილეობით. მანევრებში ჩართულია ავიაცია და სანაპირო ჯარები.

მანამდე, წვრთნებში მონაწილეობის მისაღებად, დარდანელის და ბოსფორის სრუტეების გავლით, შავ ზღვაში რუსეთის ბალტიისა და ჩრდილოეთის ფლოტების 6 დიდი სადესანტო ხომალდი შევიდა.

20 იანვარს, რუსეთმა განაცხადა, რომ მსოფლიოს სხვადასხვა რეგიონში მასშტაბურ სამხედრო-საზღვაო წვრთნებს ჩაატარებს.

თავდაცვის სამინისტროს განცხადებით, წვრთნებში მონაწილეობას მიიღებს 140 ათასზე მეტი სამხედრო ხომალდი და 60-ზე მეტი თვითმფრინავი. უწყების ცნობით, წვრთნები ჩატარდება, როგორც სანაპირო წყლებში, ისე შედარებით მოშორებულ "ოპერატიულად მნიშვნელოვან" რაიონებში, მათ შორის ხმელთაშუა ზღვაში, ჩრდილო-აღმოსავლეთ ატლანტისა და წყნარ ოკეანეში.