უკრაინის ხელისუფლებამ უარყო მედიაში გავრცელებული ინფორმაცია უკრაინის საჰაერო სივრცის მოსალოდნელი დახურვის თაობაზე. შესაბამისი განცხადება უკრაინის ინფრასტრუქტურის სამინისტრომ გაავრცელა.
სამინისტროს განცხადებით, საჰაერო სივრცის დახურვა უკრაინის სუვერენული უფლებაა, თუმცა მსგავსი გადაწყვეტილება არ მიღებულა.
უწყების ცნობით, ავიაკომპანიიების უმეტესობა აგრძელებს მუშაობას ყოველგვარი შეზღუდვის გარეშე, თუმცა "ზოგიერთი ავიაგადამზიდავი განიცდის სირთულეებს სადაზღვევო ბაზრების რყევებთან დაკავშირებით".
ცოტა ხნის წინ, გავრცელდა ცნობა, რომ ერთ-ერთმა ბრიტანულმა კომპანიამ შეტყობინება გაუგზავნა ავიაკომპანიებს, რომლის თანახმადაც 14 თებერვლიდან შეწყვეტს უკრაინის საჰაერო სივრცეში სამოქალაქო თვითმფრინავების დაზღვევას.
აღნიშნულთან დაკავშირებით, ინფრასტრუქტურის სამინისტრო აცხადებს, რომ სახელმწიფო მზადაა მხარი დაუჭიროს ავიაკომპანიებს და გეგმავს დამატებითი ფინანსური გარანტიების გაცემას.
საჰაერო სივრცის დახურვის შესახებ ინფორმაცია უკრაინის პრეზიდენტის ადმინისტრაციის წარმომადგენელმაც უარყო.
12 თებერვალს ნიდერლანდურმა ავიაკომპანია KLM-მა განაცხადა, რომ წყვეტს რეისებს კიევში და უკრაინის საჰაერო სივრცის გამოყენებას. ამავდროულად, გავრცელდა ცნობა, რომ საჰაერო მიმოსვლის შეჩერებას განიხილავს გერმანული ავიაკომპანია Lufthansa.
