შეერთებული შტატების პრეზიდენტ ჯო ბაიდენსა და რუსეთის პრეზიდენტ ვლადიმირ პუტინს შორის სატელეფონო საუბარი გაიმართა.
თეთრი სახლის ინფორმაციით, საუბარი ერთ საათზე ოდნავ მეტ ხანს გაგრძელდა.
ბაიდენმა პუტინთან საუბრისას განაცხადა, რომ ვაშინგტონი მზად არის უკრაინის ირგვლივ დაძაბულობის დიპლომატიური გზით მოგვარებისთვის, თუმცა ასევე მზად არის ნებისმიერი სხვა სცენარისთვისაც.
"პრეზიდენტმა ბაიდენმა ნათლად განუცხადა პრეზიდენტ პუტინს, რომ შეერთებული შტატები კვლავ მზადაა დიპლომატიისთვის თავის მოკავშირეებსა და პარტნიორებთან სრული კოორდინაციით, მაგრამ ჩვენ ასევე მზად ვართ სხვა სცენარებისთვისაც", - ნათქვამია თეთრი სახლის განცხადებაში.
ამავდროულად, ბაიდენმა გააფრთხილა პუტინი უკრაინაში შეჭრის შემთხვევაში მოსალოდნელი მძიმე შედეგების შესახებ.
"თუ რუსეთი განახორციელებს მორიგ შეჭრას უკრაინაში, შეერთებული შტატები მოკავშირეებსა და პარტნიორებთან ერთად მტკიცედ უპასუხებს და რუსეთისთვის სწრაფი და სერიოზული შედეგები დადგება", - აღნიშნულია განცხადებაში.
ბაიდენის განცხადებით, უკრაინაში რუსეთის შეჭრა გამოიწვევს უზარმაზარ ადამიანურ ტკივილს და რუსეთის მდგომარეობასაც უკან დახევს.
კრემლის პრესსპიკერის განცხადებით, საუბარი ვაშინგტონის ინიციატივით გაიმართა.
მანამდე, პუტინთან სატელეფონო საუბარი გამართა საფრანგეთის პრეზიდენტმა ემანუელ მაკრონმა. ელისეს სასახლის მიერ გავრცელებული ინფორმაციით, საფრანგეთის პრეზიდენტმა პუტინს ევროპელი პარტნიორებისა და მისი მოკავშირეების შეშფოთება გააცნო.
"მხარეებმა "მინსკის შეთანხმებების" განხორციელების წინსვლის გზები განიხილეს და ევროპაში უსაფრთხოებისა და სტაბილურობის პირობებზე გამართეს დისკუსია“, - აღნიშნულია ელისეის სასახლის მიერ გავრცელებულ განცხადებაში.
შეგახსენებთ, გუშინ დასავლურ მედიაში გავრცელდა ცნობა, რომ შეერთებული შტატების პრეზიდენტმა ჯო ბაიდენმა ტრანსატლანტიკურ მოკავშირეებს დაზვერვის ახალი მონაცემები გაუზიარა, რომლის თანახმადაც რუსეთმა უკრაინაში შეჭრის გადაწყვეტილება მიიღო. ამ ფონზე უკრაინის საგარეო საქმეთა სამინისტრო მოქალაქეებს სიმშვიდის შენარჩუნებისკენ მოუწოდებს.
