უკრაინის თავდაცვის მინისტრის ოლექსი რეზნიკოვის განცხადებით, რუსეთი, რომელსაც მან აგრესორი უწოდა, თუ უკრაინაში შეჭრას შეეცდება, ვერ აიღებს ვერცერთ ქალაქს.
რეზნიკოვის განცხადებით, უკრაინის შეიარაღებული ძალები სრულიად მზად არიან საპასუხო ქმედებებისთვის და არ დათმობენ უკრაინის მიწებს.
თავდაცვის მინისტრის თქმით, ახლანდელი ვითარება 2014 წლისგან განსხვავდება, რადგან მაშინ უკრაინელები ფსიქოლოგიურად არ იყვნენ მზად, წინააღმდეგობა გაეწიათ მათთვის, ვისთან ერთადაც ჯერ კიდევ წინა დღით, ერთი მაგიდის ირგვლივ ისხდნენ.
"ვინც ერთხელ მაინც ჩახედავს ჩვენს ჯარისკაცებს თვალებში, დარწმუნდება, რომ 2014 წელი აღარ განმეორდება. აგრესორი ვერ დაიკავებს ვერც კიევს, ვერც ოდესას ან ხარკოვს და ვერც სხვა რომელიმე ქალაქს", - განაცხადა რეზნიკოვმა.
თავდაცვის მინისტრის განცხადებით, უკრაინას ბოლო 15 წლის განმავლობაში ყველაზე ძლიერი არმია ჰყავს. მისივე თქმით, ამაში დიდი წვლილი მიუძღვის საერთაშორისო პარტნიორების მხარდამჭერას, რომელიც ყველაზე მაღალ ნიშნულზეა დამოუკიდებლობის მოპოვების შემდეგ.
რეზნიკოვმა სიმშვიდის შენარჩუნებისკენ მოუწოდა უკრაინის მოქალაქეებს და დასძინა, რომ სიმშვიდე არის მთავარი იარაღი, რომელსაც თავდაცვისთვის მყარი საფუძვლის მიცემა შეუძლია.
