უკრაინაში რუსეთის მოსალოდნელი შეჭრის გამო მზარდი შეშფოთების მიუხედავად, დიდი ბრიტანეთის ელჩი უკრაინაში მელინდა სიმონსი აცხადებს, რომ რჩება კიევში და საელჩოს ძირითად გუნდთან ერთად განაგრძობს მუშაობას.
"ვრჩები კიევში და ვაგრძელებ მუშაობის ძირითად გუნდთან ერთად. საელჩო განაგრძობს მუშაობას", - წერს სიმონსი სოციალურ ქსელში.
მანამდე დიდი ბრიტანეთის ხელისუფლებამ უკრაინაში მყოფ თავის მოქალაქეებს ქვეყნის დაუყოვნებლივ დატოვებისკენ მოუწოდა. მანამდე, უკრაინის სასწრაფოდ დატოვებისკენ მოუწოდა ამერიკის მოქალაქეებს შეერთებული შტატების პრეზიდენტმა, ჯო ბაიდენმა.
ბოლო 24 საათის განმავლობაში, სულ მცირე, 18-მა ქვეყანამ მოუწოდა თავის მოქალაქეებს, თავი შეიკავონ უკრაინაში მოგზაურობისგან ან დატოვონ მისი ტერიტორია რუსეთთან სამხედრო კონფლიქტის საფრთხის გამო.
თავიან მოქალაქეებს უკრაინის დატოვებისკენ მოუწოდეს შეერთებულმა შტატებმა, გერმანიამ, ავსტრალიამ, დიდმა ბრიტანეთმა, ბელგიამ, საბერძნეთმა, ისრაელმა, კანადამ, ლატვიამ, ნიდერლანდებმა, ახალმა ზელანდიამ, ნორვეგიამ, ჩრდილოეთ მაკედონიამ, ფინეთმა, მონტენეგრომ, ესტონეთმა, იაპონიამ და სამხრეთ კორეამ.
შეგახსენებთ, გუშინ დასავლურ მედიაში გავრცელდა ცნობა, რომ შეერთებული შტატების პრეზიდენტმა ჯო ბაიდენმა ტრანსატლანტიკურ მოკავშირეებს დაზვერვის ახალი მონაცემები გაუზიარა, რომლის თანახმადაც რუსეთმა უკრაინაში შეჭრის გადაწყვეტილება მიიღო. ამ ფონზე უკრაინის საგარეო საქმეთა სამინისტრო მოქალაქეებს სიმშვიდის შენარჩუნებისკენ მოუწოდებს.
