ეროვნული უსაფრთხოების საკითხებში აშშ-ის პრეზიდენტის მრჩეველმა, ჯეიკ სალივანმა, თეთრ სახლში გამართულ ბრიფინგზე განაცხადა, რომ რუსეთის სამხედრო ინტერვენცია უკრაინაში შეიძლება დაიწყოს ნებისმიერ დროს.
მისივე თქმით, პუტინი შესაძლოა აღარ დაელოდოს ოლიმპიადის დასრულებას და მანამდე დაიწყოს შეჭრა.
ამავდროუად, სალივანის თქმით, აშშ არ ფიქრობს, რომ ვლადიმერ პუტინმა უკრაინაში შეჭრის შესახებ გადაწყვეტილება უკვე მიიღო, თუმცა აშშ მოვლენების განვითარების ყველანაირი სცენარისთვისა არის მზად.
"თუმცა საკმარისი დონის შეშფოთება გვაქვს იმის საფუძველზე, თუ რას ვხედავთ ადგილზე და რა მონაცემები მიიღეს ჩვენი დაზვერვის ანალიტიკოსებმა. ჩვენ ამ მკაფიო მესიჯს ვაგზავნით. ეს საგანგებო გზავნილია, რადგან ჩვენ საგანგებო სიტუაციაში ვართ", - განაცხადა ჯეიკ სალივანმა.
ბრიფინგზე ჯეიკ სალივანმა კიდევ ერთხელ გაიმეორა უკრაინაში მყოფი ამერიკის მოქალაქეებისადმი მოწოდება, რომ დაუყოვნებლივ დატოვონ ქვეყანა.
"ჩვენ ვაგრძელებთ კიევში საელჩოს პერსონალის რაოდენობის შემცირებას და პრეზიდენტ ბაიდენისა და სახელმწიფო მდივან ბლინკენის განცხადებების მსგავსად, მსურს, მოვუწოდო უკრაინაში მყოფ ამერიკელებს, სასწრაფოდ დატოვონ ქვეყანა. რაც შეიძლება მალე, მომდევნო 24-48 საათის განმავლობაში", - თქვა მან.
ამ განცხადებას წინ უსწრებდა პრეზიდენტ ბაიდენის ვიდეოშეხვედრა ტრანსატლანტიკურ მოკავშირეებთან.
თეთრი სახლის ინფორმაციით, ბაიდენთან შეხვედრას ესწრებოდნენ ნატო-ს გენერალური მდივანი, ევროკომისიის პრეზიდენტი, ევროპული საბჭოს პრეზიდენტი, კანადის, დიდი ბრიტანეთის, იტალიის პრემიერ-მინისტრები, საფრანგეთი, პოლონეთის და რუმინეთის პრეზიდენტები და გერმანიის კანცლერი.
მედია ვარაუდობს, რომ ბაიდენმა მოკავშირეებს დაზვერისგან მიღებული ახალი ცნობები გაუზიარა, რომლის თანახმადაც პუტინმა უკრაინაში შეჭრის გადაწყვეტილება უკვე მიიღო.
ცოტა ხნის წინ, ცნობილი გახდა, რომ 12 თებერვალს საფრანგეთის პრეზიდენტი ემანუელ მაკრონი და ჯო ბაიდენი სატელეფონო საუბარს გამართავენ პუტინთან.
