უკრაინის საზღვართან რუსეთის ჯარების მასშტაბური დაგროვების ფონზე, იაპონია და სამხრეთ კორეა თავიანთ მოქალაქეებს მოუწოდებენ, რომ დაუყოვნებლივ დატოვონ უკრაინა.
იაპონიის საგარეო საქმეთა სამინისტროს განცხადებით, "სიტუაცია კვლავ არაპროგნოზირებადია".
"მიუხედავად იმისა, რომ ვითარების განმუხტვის მიზნით დიპლომატიური მოქმედებები განხორციელდა, არსებობს მზარდი მოლოდინი, რომ სიტუაცია სწრაფად გაუარესდეს", - ნათქვამია განცხადებაში.
იაპონიის საგარეო საქმეთა სამინისტრო კატეგორიულად მოუწოდებს მოქალაქეებს, რომ სასწრაფოდ დატოვონ ქვეყანა და არ იმოგზაურონ უკრაინაში.
"ვერ გამოვრიცხავთ იმის შესაძლებლობას, რომ კომერციული ფრენები შეჩერდეს. მომავალში შესაძლოა ვითარება უკიდურესად გართულდეს და გაძნელდეს ქვეყნის არავითარი მიზნით", - აღნიშნულია განცხადებაში.
სამხრეთ კორეის საგარეო საქმეთა სამინისტროს მიერ გავრცელებულ პრესრელიზში კი ნათქვამია, რომ სამხრეთ კორეის მთავრობამ გაზარდა უკრაინაში მოგზაურობის გაფრთხილების დონე მე-4 უმაღლეს დონემდე, აკრძალა უკრაინაში გამგზავრება და ქვეყნის მოქალაქეებს უბრძანა სასწრაფო ევაკუაცია.
სამინისტროს თქმით, განგაშის მე-4 დონე 12 თებერვალს ამოქმედდება.
სამინისტროში აცხადებენ, რომ ეს არის პრევენციული ღონისძიება იმ შემთხვევაში, თუ უკრაინაში ვითარება სწრაფად გაუარესდება.
ცოტა ხნით ადრე, ჯო ბაიდენმა უკრაინაში მყოფ ამერიკის მოქალაქეებს ქვეყნის დაუყოვნებლივ დატოვებისკენ მოუწოდა.
როგორც ბაიდენმა ტელეკომპანია NBC-სთან ინტერვიუში განაცხადა, რუსეთის სამხედრო ინტერვენციის შემთხვევაში, ამერიკელების უკრაინიდან ევაკუაცია შეუძლებელი იქნება.
