დღეს შეერთებული შტატების პრეზიდენტი ჯო ბაიდენი ვიდეოშეხვედრას გამართავს ტრანსატლანტიკურ მოკავშირეებთან, რათა განიხილონ უკრაინის ირგვლივ არსებული ვითარება.
თეთრი სახლის ინფორმაციით, შეხვედრაში მონაწილეობას მიიღებენ კანადის პრემიერ მინისტრი ჯასტინ ტრუდო, ევროკომისიის პრეზიდენტი ურსულა ფონ დერ ლაიენი, ევროპული საბჭოს პრეზიდენტი შარლ მიშელი, საფრანგეთის პრეზიდენტი ემანუელ მაკრონი, გერმანიის კანცლერი ოლაფ შოლცი, იტალიის პრემიერ მინისტრი მარიო დრაგი, ნატოს გენერალური მდივანი იენს სტოლტენბერგი, პოლონეთის პრეზიდენტი ანდჟეი დუდა, რუმინეთის პრეზიდენტი კლაუს იოჰანისი და დიდი ბრიტანეთის პრემიერ მინისტრი ბორის ჯონსონი.
ცოტა ხნით ადრე, ჯო ბაიდენმა უკრაინაში მყოფ ამერიკის მოქალაქეებს ქვეყნის დაუყოვნებლივ დატოვებისკენ მოუწოდა.
როგორც ბაიდენმა ტელეკომპანია NBC-სთან ინტერვიუში განაცხადა, რუსეთის სამხედრო ინტერვენციის შემთხვევაში, ამერიკელების უკრაინიდან ევაკუაცია შეუძლებელი იქნება.
10 თებერვალს აშშ-ის სახელმწიფო დეპარტამენტმა გამოაქვეყნა გაფრთხილება ამერიკის მოქალაქეებისადმი, რომ რუსეთის მიერ სამხედრო მოქმედებების დაწყების შემთხვევაში, აშშ-ის მთავრობა ვერ შეძლებს მოქალაქეთა ევაკუაციას.
