13 დეკემბერს, ბრიუსელში ევროკავშირის საგარეო საქმეთა მინისტრები გეგმავენ განიხილონ მოსკოვის წინააღმდეგ ახალი შესაძლო სანქციების დაწესება, რათა აღკვეთონ რუსეთის უკრაინაში შეჭრის განზრახვა. ამის შესახებ დიპლომატიურ წყაროებზე დაყრდნობით სააგენტო DPA იტყობინება.
სააგენტოს ინფორმაციით, ევროპელი დიპლომატები ეცდებიან, იპოვონ გზა სიტუაციის დეესკალაციისთვის. წყარო ამბობს, რომ "ზოგჯერ საჭიროა რბილად საუბარი, თუმცა სიმკაცრეც გარდაუვალია".
გავრცელებული ინფორმაციით, იგეგმება სანქციების დაწესება რუსული კერძო სამხედრო კომპანია "ვაგნერისა" და მასთან დაკავშირებული კომპანიებისა თუ ფიზიკური პირების წინააღმდეგ.
ბოლო კვირების განმავლობაში, რუსეთის სამხედრო ძალების უკრაინის საზღვრებთან მასშტაბური კონცენტრაციის გამო, დასავლეთი კრემლს აფრთხილებს, რომ სამხედრო ესკალაციას მძიმე შედეგები მოჰყვება.
ევროკავშირის უმაღლესი წარმომადგენლის საგარეო საქმეთა და უსაფრთხოების პოლიტიკის საკითხებში ჟოზეპ ბორელის განცხადებით, ევროკავშირი მზად არის, მის ხელთ არსებული ყველა შესაძლებლობა გამოიყენოს უკრაინის სუვერენიტეტისა და ტერიტორიული მთლიანობის მხარდასაჭერად.
ამ შაბათ-კვირას ლივერპულში გამართულ "დიდი შვიდეულის" საგარეო საქმეთა მინისტრების შეხვედრაზე, კიდევ ერთხელ მოუწოდეს კრემლს, თავი შეიკავოს უკრაინაში შეჭრისგან, რადგან ამას რუსეთისთვის მძიმე შედეგები ექნება.
მანამდე, აშშ-ის პრეზიდენტმა ჯო ბაიდენმა კიდევ ერთხელ გაიმეორა, რომ თუ პუტინი უკრაინაში შეჭრას გადაწყვეტს, რუსეთს "საშინელი ფასის" გადახდა მოუწევს.
7 დეკემბერს რუსეთის ფედერაციისა და შეერთებული შტატების პრეზიდენტებს შორის მოლაპარაკებები გაიმართა. მათთან პუტინმა წამოაყენა მოთხოვნა, რომ უკრაინა არ უნდა გახდეს ნატოს წევრი.
