აშშ-ის სახელმწიფო მდივნის თანაშემწე ევროპისა და ევრაზიის საკითხებში კარინ დონფრიდი მომავალ კვირას მოსკოვსა და კიევს ეწვევა. ინფორმაციას სახელმწიფო დეპარტამენტი ავრცელებს.
დეპარტამენტის ინფორმაციით, დონფრიდის ვიზიტი 13-15 დეკემბერს შედგება და ის რუსეთისა და უკრაინის მაღალი თანამდებობის პირებს შეხვდება.
მათივე ცნობით, ვიზიტის ფარგლებში განხილული იქნება უკრაინის საზღვართან რუსი სამხედროების კონცენტრაციის საკითხი და მდივნის თანაშემწის მიერ ხაზი გაესმება უკრაინის სუვერენიტეტის, დამოუკიდებლობის და ტერიტორიული მთლიანობის მხარდაჭერას.
ამასთან, თანაშემწე დონფრიდი ხაზს გაუსვამს კონფლიქტის დიპლომატიური გზებით მოგვარების მნიშვნელობას, მინსკის ხელშეკრულებით გათვალისწინებული შეთანხმებების შესრულებით.
მოსკოვისა და კიევის შემდეგ, დონფრიდი ბრიუსელში გაემგზავრება, სადაც 15-16 დეკემბერს ევროკავშირისა და ნატოელ მოკავშირეებთან ერთად უკრაინის ირგვლივ არსებული ვითარების დიპლომატიური გზებით გადაწყვეტის შესაძლებლობებს განიხილავს.
