ევროპისა და ევრაზიის საკითხებში შეერთებული შტატების სახელმწიფო მდივნის მოადგილის ფილიპ გორდონის განცხადებით, ნატო ღია კარის პოლიტიკას განაგრძობს. "ნატოს სტრატეგიული კონცეფცია ჯერ შეთანხმებული არ არის, თუმცა ვფიქრობ, სამართლიანია განვაცხადო, რომ ღია კარის პოლიტიკაზე მეკავშირეებს კვლავ ერთიანი პოზიციაა აქვთ. ალიანსში არსებობს კონსესური იმის თაობაზე, რომ ღია კარის პოლიტიკა სწორი პოლიტიკაა, რომ გაფართოებამ სარგებელი მოუტანა როგორც ნატოს, ასევე წევრობის მსურველ ქვეყნებს. ამიტომაც, ის უნდა გაგრძელდეს", - განაცხადა ფილიპ გორდონმა ვაშინგტონში გამართულ პრესკონფერენციაზე. ამასთან, მან საქართველოს ალიანსში გაწევრიანების პერსპექტივებზეც ისაუბრა და აღნიშნა, რომ ამერიკის შეერთებული შტატები მხარს უჭერს ბუქარესტის სამიტის გადაწყვეტილებას და საქართველოს სწაფვას გახდეს ნატოს წევრი. გარდა ამისა, ფილიპ გორდონმა კიდევ ერთხელ აღნიშნა, რომ აშშ-სა და რუსეთს შორის საქართველოს საკითხი კვლავ შეუთანხმებელია. "ნატომ გარკვევით გამოხატა საქართველოს საკითხზე უთანხმოება რუსეთთან. ალიანსის წევრმა ქვეყნებმა განაცხადეს, რომ სურთ იხილონ, 2008 წლის "ცეცხლის შეწყვეტის" შეთანხმების სრული იმპლემენტაცია. ნატოს ყველა წევრი პატივს სცემს საქართველოს სუვერენიტეტს და ტერიტორიულ მთლიანობას. ამ პოზიციაზე არიან ისინი ახლა და ამ პოზიციას დაუჭერენ მხარს ლისაბონის სამიტზეც. ჩვენ გვაქვს სრულიად თანმიმდევრული პოზიცია რუსეთთან ურთიერთობისას, ჩვენ ვთანამშრომლობთ, გვაქვს საერთო ინტერესები, მაგრამ ასევე გვაქვს აშკარა აზრთასხვადასხვაობა საქართველოს საკითხზე", - განმარტა გორდონმა.