შს მინისტრის ვანო მერაბიშვილის განცხადებით, სპეცოპერაცია "ენვერის" ვექტორი ქართული საზოგადოებისაკენ იყო მიმართული და არა რუსეთის გაღიზიანებისაკენ, მისი თქმით, "ენვერის"' მონაწილე სამართალდამცველებს სურდათ ქვეყანაში ისეთი საზოგადოებრივი განწყობის შექმნა, რომ იმ ადამიანებს, ვინც რუსულ სპეცსამსახურებთან დღესაც თანამშრომლობენ, შეშინებოდათ და ქართულ მხარესთან დაეწყოთ თანამშრომლობა. ამის შესახებ შს მინისტრმა "იმედის" ეთერში განაცხადა.
"როდესაც ჩვენ ამ სპეცოპერაციას ვატარებდით და ვაშუქებდით, მთავარი ამოცანა იყო არა ის, რომ გაგვეღიზიანებინა რუსეთი. ამ სპეცოპერაციის ვექტორი რუსეთისკენ არ იყო მიმართული, არამედ ქართული საზოგადოებისაკენ. ჩვენ გვაინტერესებდა საქართველოში ისეთი საზოგადოებრივი განწყობის და აზრის შექმნა, რომ იმ ქართველების მიმართ, ვინც თავის წარსულდან და საქმიანობიდან გამომდინარე დღესაც თანამშრომლობენ ამა თუ იმ ფორმით რუსეთის სპეცსამსახურებთან. მოგვეხდინა ზეგავლენა. მათ უნდა შეშინებოდათ და მეტი სიფრთხილით მოკიდებოდნენ იმ საქმეს რის შესრულებასაც მეზობელი ქვეყნის სპეცსამსახურები სთხოვდნენ", - განაცხადა მინისტრმა და დასძინა, რომ აღნიშნულ ჯაშუშურ ქსელში შემავალი ადამიანების რაოდენობა გაცილებით მეტია ვიდრე "ენვერის" დროს იქნა დაკავებული. მისივე თქმით, დარჩენილ ჯაშუშებზე თვალთვალი კვლავ გრძელდება.
"ჩვენი თვითმიზანი არ არის ბევრი ადამიანის დაკავება, უფრო მეტს გეტყვით, თქვენ იცით, რომ ჩვენ განცხადება გავაკეთეთ, ამ ქსელში შემავალი ადამიანების რაოდენობა გაცილებით უფრო მეტია ვიდრე ჩვენ დავაკავეთ, ეს იმას არ ნიშნავს, რომ ეს ადამიანები ასე დარჩებიან, რა თქმა უნდა, ყველა მათგანზე თვალთვალი გრძელდება. ზოგიერთ მათგანთან ჩვენი ჩავატარეთ სპეციალური მუშაობა. ჩვენი მიზანი არის, რომ მათი ჯაშუშური საქმიანობა შეწყდეს, ვინც აქამდე თანამშრომლობდა რუსულ სპეცსამსახურებთან. მათ უნდა ითანამშრომლონ ჩვენთან და მათ წინააღმდეგ შეწყდება სამართლებრივი დევნა და რაც ყველაზე მნიშვნელოვანია, თუ ვინმე მომავალში კვლავ დააპირებს ასეთი ქმედების განხორციელებას, მან უნდა იცოდეს, რომ საქართველოში არსებობს სერიოზული სპეცსამსახური რომელიც მომავალში ამ საქმეს გახსნის", - განაცხადა მინისტრმა.
