სამხედრო ექსპერტის თორნიკე შარაშენიძის აზრით, რუსეთსა და ნატოს შორის "ცივი ომი" დიდი ხანია დასრულებულია.
"რუსეთსა და ნატოს შორის ცივი ომი დიდი ხანია დასრულებულია. ეს მაშინ მოხდა, როცა ბერლინის კედელი დაინგრა. ახლა მხოლოდ რუსეთისთვის გრძელდება "ცივი ომი", თუმცა არა ნატოსთან, არამედ დსთ-ის სივრცეში, საკუთარ სამეზობლოსთან", - განუცხადა შარაშენიძემ "ჯი-ეიჩ-ენს".
რაც შეეხება მოსკოვსა და ჩრდილოატლანტიკურ ალიანსს შორის ურთიერთობების შესაძლო გაღრმავებას. სამხედრო ექსპერტის აზრით, დაახლოება მართლაც მოსალოდნელია.
"დაახლოების პოლიტიკური ნება აშკარად არსებობს და განსაკუთრებით დასავლეთის მხრიდან, თუმცა ამ პროცესს რაღაც აფერხებს და ეს უპირველესად, რუსული პარანოიაა", - დასძინა ექსპერტმა.
შეგახსენებთ, რომ რუსეთის საგარეო საქმეთა მინისტრ სერგეი ლავროვმა იმედი გამოთქვა, რომ ლისაბონის სამიტზე, როგორც მოსკოვი, ისე ნატო "ცივი ომის" დასრულებას დააფიქსირებენ.