შს მინისტრის ვანო მერაბიშვილის შეფასებით საქართველოს იურისდიქცია ოკუპირებულ ტერტორიებზე კვლავ გავრცელდება. მისი თქმით, გამორიცხულია საქართველოსნაირმა თავისუფალმა ქვეყანამ ომი წააგოს რუსეთისნაირ კორუმპირებულ სახელმწიფოსთან. ამიტომ მერაბიშვილი ვარაუდობს, რომ გრძელვადიან პერსპექტივაში ოკუპირებულ რეგიონებს საქართველოსთან შეერთება მოუწევთ. ამის შესახებ შინაგან საქმეთა მინისტრმა ტელეკომპანია "იმედის" ეთერში ისაუბრა.
"სიმართლე ყოველთვის იმარჯვებს. ქვეყანა რომელიც ვითარდება, რომელიც თავისუფალია, თუნდაც ქვეყანა, სადაც პოლიცია უყვარს ხალხს, ამ მხარემ და ამ ხალხმა შეუძლებელია წააგოს ომი ისეთ ძალასთან, სადაც არის კორუფცია, სადაც არ არის ადამიანის უფლებების დაცვა, სადაც არ არის თავისუფალი ეკონომიკა, სადაც არ არის თავისუფალი გადაადგილება და საიდანაც ჯარისკაცები გამორბიან და თავშესაფარს პოულობენ ჩვენს ტერიტორიაზე. გრძელვადიან პერსპექტივაში ამ რეგიონებს სხვა არჩევანი არ ექნებათ", - აღნიშნა მერაბიშვილმა.