დღეს, 12 ნოემბერს, პარლამენტის პლენარულ სხდომაზე 2011 წლის ბიუჯეტის პროექტის პირველადი განხილვა შედგება და დებატებიც გაიმართება. განხილვის შემდეგ ბიუჯეტის პროექტი შენიშვნებით მთავრობას დაუბრუნდება, რის შემდეგაც დოკუმენტი კვლავ პარლამენტში შევა.
ყველა აღნიშნული პროცედურის შემდეგ ბიუჯეტის პროექტი მთავრობას კიდევ ერთხელ დაუბრუნდება და საბოლოო ვარიანტი დამტკიცდება პარლამენტის სიითი შემადგენლობის უმრავლესობის მიერ, პარლამენტის საშემოდომო სესის დასრულებამდე, არა უგვიანეს დეკემბრის მესამე პარასკევისა.
2011 წლის ბიუჯეტის პროექტი პარლამენტში პირველად 1-ელ ოქტომბერს შევიდა, თუმცა მას შემდეგ, რაც ის განსახილველად მთავრობას დაუბრუნდა, ბიუჯეტი გაიზარდა და ახლა 6 მლრდ 60 მილიონის ნაცვლად, 7 მილიარდ 88 მლნ ლარია.
მომავალი წლის ბიუჯეტის პროექტის მთავარი პრიორიტებები ტურისტული ინფრასტრუქტურის განვითარება, გზების რეაბილიტაცია და განათლებაა. რაც შეეხება ჯანდაცვას, აღმასრულებელი ხელისუფლება ცალსახად აცხადებს, რომ ჯანდაცვის პროგრამები შენარჩუნდება და ყველა ბენეფიცია, რომელიც წელს ფინანსდება, მომავალ წელსაც დაფინანსდება.
საპარლამენტო ოპოზიციას უკვე აქვს შენიშვნები ახალ პროექტთან დაკავშირებით, ოპოზიცია ითხოვს, რომ ინფორმაცია თანხის გადანაწილების შესახებ უფრო გამჭვირვალე იყოს.