Time-მა ექსტრემისტული დაჯგუფება "თალიბანის" ერთ-ერთი დამფუძნებელი და ლიდერი მოლა აბდულ ღანი ბარადარი მსოფლიოს 100 ყველაზე გავლენიანი ადამიანების სიაში შეიყვანა.
მოლა აბდულ ღანი ბარადარისთან ერთად, გავლენიანი ადამიანების ლიდერების კატეგორიაში მოხვდნენ აშშ-ის მოქმედი და ყოფილი პრეზიდენტები - ჯო ბაიდენი და დონალდ ტრამპი, ვიცე პრეზიდენტი კამალა ჰარისი, ჩინეთის ლიდერი სი ძინპინი, ინდოეთის პრემიერ-მინისტრი ნარენდრა მოდი, ისრაელის პრემიერ-მინისტრი ნაფტალი ბენეტი, ირანის პრეზიდენტი ებრაჰიმ რაისი და სხვები.
Time-სთვის აბდულ ღანი ბარადარის შესახებ მოკლე სვეტი პაკისტანში მომუშავე ჟურნალისტმა აჰმედ რაშიდმა დაწერა.
"მოლა აბდულ ღანი ბარადარი, რომელიც ერთ-ერთია მათ შორის ვინც 1994 წელს "თალიბანი" დააფუძნა, დაჯგუფების წევრებს შორის პატივისცემით სარგებლობს. იგი არის ქარიზმატული სამხედრო ლიდერი და ღრმად რელიგიური ფიგურა.
როდესაც "თალიბანმა" აგვისტოში ავღანეთში გამარჯვებას მიაღწია, ეს დიდწილად ბარადარის მოლაპარაკებების შედეგია. მისი თქმით, ის იღებდა ყველა მთავარ გადაწყვეტილებას, მათ შორის დამხობილი მთავრობის წევრებისთვის ამნისტიის შეთავაზებაზე, ქაბულში შესვლისას სისხლისღვრის თავიდან აცილებაზე და მეზობელ სახელმწიფოებთან, მათ შორის პაკისტანსა და ჩინეთთან კონტაქტებზე.
ახლა სწორედ ბარადარია საყრდენი წერტილი ავღანეთის მომავლისთვის. თალიბანის დროებით მთავრობაში ის პრემიერ-მინისტრის მოადგილედ დაინიშნა.
ბარადარი მშვიდი და კარჩაკეტილი ადამიანის შთაბეჭდილებას ტოვებს, რომელიც იშვიათად ჩნდება საზოგადოებაში და არც თუ ისე ხშირად აკეთებს საჯარო განცხადებებს. იგი წარმოადგენს თალიბანის შედარებით უფრო ზომიერ მიმდინარეობას. დასავლეთის მხარდაჭერისა და ავღანეთისთვის უკიდურესად აუცილებელი ფინანსური დახმარების მოსაპოვებლად, ბარადარს გადამწყვეტი მნიშვნელობა ენიჭება.
მთავარ შეკითხვად რჩება, შეუძლია თუ არა ადამიანს, რომელმაც ავღანეთიდან ამერიკელები გააძევა, შეცვალოს საკუთარი მოძრაობა", - წერს აჰმედ რაშიდი ბარადარზე.
