ჩვენ გვყავს ისეთი მერობის კანდიდატები, რომლებიც ძალიან კარგი, სანთელივით კანდიდატები არიან, - ამის შესახებ კულტურის მინისტრმა, თეა წულუკიანმა ტელეკომპანია "იმედის" გადაცემაში "არჩევნები 2021" განაცხადა.
წულუკიანის განცხადებით, 9 წლის თავზე "ქართულ ოცნებას" არ აქვს საქმე ისე, როგორც "ნაციონალურ მოძრაობას" ჰქონდა, რომელიც "ცხვირს ვერ ჰყოფდა გარეთ იმდენი ცუდი საქმე ჰქონდა გაკეთებული".
"9 წლის თავზე, რომელიც ბევრი დროა ხელისუფლებისთვის, ჩვენ გვყავს ისეთი მერობის კანდიდატები, რომლებიც ძალიან კარგი, სანთელივით კანდიდატები არიან. მაგალითად, ნაძალადევში ირაკლი ხელაძე, ჩვენ გვყავს შესანიშნავი ქალი კანდიდატი, ქალბატონი ლაცაბიძე რუსთავში. ჩვენ გვყავს მცხეთაში ძალიან კარგი კანდიდატი მცხეთაში, რომელიც სხვათაშორის ამასწინათ გააქილიკეს ბატონი დიმიტრი ზურაბიშვილი, მაგან რა იცის მენეჯერობაო, არა თქვენმა მზემ, უდუმაშვილმა იცის მენეჯერობა მცხეთაში. ბატონი ზურაბიშვილი იუსტიციის სამინისტროში მე დავნიშნე, მენეჯერულ პოზიციაზე იყო და შესანიშნავი მენეჯერია, ის არის მუხრანელი კარგი კაცი, რომელმაც იცის რა სტკივა იქაურ მუნიციპალიტეტს. რომელი ერთი ჩამოვთვალო, თუნდაც გორის კანდიდატი, ოლიმპიური ჩემპიონი და მრავალგზის მსოფლიო ჩემპიონი, ბატონი ხინჩეგაშვილი, რომელიც გორის საამაყო შვილი და ძალიან ბევრი სხვა. ამიტომ ჩვენ არ გვაქვს საქმე 9 წლის თავზე ისე, როგორც ნაციონალურ მოძრაობას ჰქონდა , რომელიც იმალებოდა ცხვირს ვერ გამოყოფდა ქუჩაში, იმდენი ცუდი საქმე ჰქონდა გაკეთებული", - თქვა წულუკიანმა.
