მონტენეგროში სერბეთის მართლმადიდებელი ეკლესიის ახალი მიტროპოლიტის ინტრონიზაციას, რომელსაც სერბეთის ეკლესიის მამამთავარი, პატრიარქი პორფირე აღასრულებდა, მოსახლეობის მწვავე პროტესტი მოჰყვა.

ინტრონიზაცია მონტენეგროს ძველ დედაქალაქში, ცეტინიეში, ისტორიულ მონასტერში გაიმართა.

სერბეთის პატრიარქმა მონტენეგროში მართლმადიდებელი ეკლესიის მეთაურად იოანიკეს მეორე (მიჩოვიჩი) დანიშნა. მონტენეგროს ტერიტორია სერბეთის ეკლესიის იურისდიქციაში შედის, როგორც მონტენეგრო-ზღვისპირეთის მიტროპოლია.

დემონსტრანტებმა ბარიკადები აღმართეს ცეტინის შესასვლელთან, რითაც ცდილობდნენ, ხელი შეეშალათ ინტრონიზაციისთვის. 

საპროტესტო აქციის მონაწილეები ამბობენ, რომ მონტენეგროში არსებული ყველა რელიგიური ობიექტი მონტენეგროელებსა და მონტენეგროს სახელმწიფოს ეკუთვნის.

"დავიღალეთ ბელგრადის მიერ ჩვენი ერის უარყოფით და იმით, რომ გვკარნახობს, თუ რა არის ჩვენი რელიგიური უფლებები“, - თქვა ერთ-ერთმა დემონსტრანტმა Reuters-თან საუბრისას.

ზოგიერთი მომიტინგე პროტესტის ნიშნად ქვებსა და ბოთლებს ისროდა, რამაც პოლიცია იძლებული გახადა, დემონსტრანტების წინააღმდეგ ცრემლსადენი გაზი გამოეყენებინა, რაც დემონსტრანტებსა და პოლიციელებს შორის შეტაკებებში გადაიზარდა.

მონტენეგრომ სერბეთისგან დამოუკიდებლობა 2006 წელს მოიპოვა, თუმცა ეკლესია კვლავ რჩება სერბეთის მართლმადიდებელი ეკლესიის იურისდიქციის ქვეშ. 

მონტენეგროელები თავიანთი სახელმწიფოებრივი სუვერენიტეტის შელახვად თვლიან სერბეთის პატრიარქის მიერ მონტენეგროს ეკლესიის მეთაურის ხელდასხმას.

დაახლოებით 630 000 მონტენეგროელი, რომელიც თავს ეთნიკურ სერბად მიიჩნევს, ქვეყნის მოსახლეობის მესამედს შეადგენს. მონტენეგროს მოსახლეობის უმრავლესობა, ეთნიკური წარმომავლობის მიუხედავად, სერბეთის მართლმადიდებელი ეკლესიის წევრია.

ფოტო: EPA, Reuters