სოფლის მეურნეობის სამინისტრო საქართველოს სამელიორაციო ინფრასტრუქტურის და სამელიორაციო ასოციაციების ერთიანი მონაცემთა ბაზის შექმნას გეგმავს.
ამის შესახებ "ქვეყნის ძირითადი მონაცემები და მიმართულებები 2011-2014 წლებისათვის" დოკუმენტში ნათქვამი.
მონაცემთა ბაზის დამუშავებისას უნდა შეიქმნას მატრიცა ARC-GIS პროგრამული უზრუნველყოფით, მისი შემდგომი განვითარების, სრულყოფისა და უნიფიცირების შესაძლებლობით. ერთიანი ჟPშ კოორდინატთა სისტემაში ინტეგრირებით. აგრეთვე, საჭიროა სამელიორაციო ასოციაციების ხელმძღვანელების გადამზადება, ტესტირება და შესაბამისად სერტიფიცირება.
დღეისათვის სამელიორაციო ასოციაციებს არ გააჩნიათ სრულყოფილი მონაცემთა ბაზა, როგორც ინფრასტრუქტურის ტექნიკური ინვენტარიზაციის, ასევე წყალმომხმარებლების იდენტიფიკაციის შესახებ. უმეტეს შემთხვევაში არ ტარდება სამუშაოები წყალუზრუნველყოფის ოპტიმიზაციის მიზნით.
სამელიორაციო ასოციაცია უძლურია გაატაროს ქმედითი საქმიანობა წყალმომხმარებლების მიერ კულტურების მონაცვლეობის, ფართობების სარწყავად მომზადების, წყლის რაციონალურად გამოყენების უზრუნველყოფის მიმართულებით.
პროექტის განხორციელებით კი სოფლის მეურნეობის სამინისტრო წყალსამეურნეო რეჟიმების სრულყოფას; სამელიორაციო ინფრასტრუქტურის მონაცემთა ბაზის სრულყოფასა და მათი ფუნქციონირების ოპტიმიზაციას; წყლის რაციონალური გამოყენების გაზრდასა და მელიორირებული სასოფლო-სამეურნეო სავარგულების ფართობების ზრდას მოელის.