"რეფერალური ჰოსპიტალის" მფლობელი პოლონური კომპანია "დევანი" გახდა, რომლაც ობიექტი ეკონომიკისა და მდგრადი განვითარების სამინისტროს მიერ გამოცხადებულ აუქციონზე 550 ათას დოლარად იყიდა.
როგორც სააგენტო "ჯი-ეიჩ-ენს" "დევანის" წარმომადგენლებმა განუცხადეს, ინვესტორი ვალდებულებას იღებს, რომ სამი წლის განმავლობაში 3 მლნ. ევროს ინვსტიცია განახორციელებს. ცნობილი ხდება ისიც, რომ პოლონური "დევანი" თავისი სამომავლო გეგმების შესახებ ოფიციალურად 20 ნოემბრისთვის დაგეგმილ პრეზენტააზე განაცხადებს.
შეგახსენებთ, რომ "რეფერალური ჰოსპიტალის" საწყისი ღირებულება 0,5 მლნ დოლარია. "რეფერალური ჰოსპიტალის" საწესდებო კაპიტალი 1 მლნ. 939 თას 338 ლარს შეადგენს. იმავდროულად მას 166 ათას 188 ლარს დებიტორული დავალიანება და 333 ათას 255 ლარის კრედიტორული დავალიანება აქვს.
საპრივატიზაციო პირობების თანახმად, შესაბამისი ოქმის გაფორმებიდან 36 თვეში, მფლობელი ვალდებული ხდება 3 მილიონი ევროს ინვესტიცია განახორციელოს, შემდეგი გრაფიკის მიხედვით: პირველი 12 თვის განმავლობაში - 250000 ევრო, შემდეგი 12 თვის განმავლობაში - 500000 ევრო, ხოლო ბოლო 12 თვის განმავლობაში - 2250000 ევროს ინვესტიცია განახორციელოს. იმავდროულად 7 წლის განმავლობაში "რეფერალური ჰოსპიტალის" სამედიცინო პროფილი უნდა შეუნარჩუნდეს.