ხმელთაშუა ზღვის ქვეყნებში ჰაერის ტემპერატურის კიდევ უფრო მატებას მოელიან. ზოგიერთ რეგიონში ტემპერატურამ უკვე მიაღწია რეკორდულ ნიშნულს.
მაღალი სიცხეები საფრანგეთს, საბერძნეთს, ესპანეთსა და იტალიას უტევს.
იტალიური გამოცემა La Repubblica-ს ცნობით, კუნძულ სიცილიაზე ჰაერის ტემპერატურამ 48.8 გრადუსს მიაღწია. თუ მსოფლიო მეტეოროლოგიური ორგანიზაცია დაადასტურებს ამ მონაცემებს, მაშინ ეს იქნება ევროპის ტერიტორიაზე დაფიქსირებული ყველაზე მაღალი ტემპერატურა. ბოლოს, ევროპაში რეკორდული ტემპერატურა 1977 წელს ათენში დაფიქსირდა - 48 გრადუსი.
ცხელმა ამინდებმა ტყის ხანძრების გავრცელება გამოიწვია იტალიის რამდენიმე რეგიონში, ხანძრები მძვინვარებდა თურქეთში და კვლავაც მძვინვარებს საბერძნეთში.
აფრიკის კონტინენტზე, ხმელთაშუა ზღვის გასწვრივ მდებარე ქვეყნებშიც ანომალიური სიცხეებია. ოთხშაბათს, ტუნისის ქალაქ კაირუანში ჰაერის ტემპერატურა 50.3 გრადუსამდე გაიზარდა. ეს რეკორდული მაჩვენებელია ტუნისისთვის. აღსანიშნავია, რომ ამ რეგიონში ყველაზე მაღალი ტემპერატურა 2018 წელს ალჟირში დაფიქსირდა - 51.3 გრადუსი.
ამ დროისთვის, ალჟირში ტემპერატურის მატებას 47 გრადუსამდე მოელიან. ძლიერმა სიცხემ უკვე გამოიწვია ქვეყნის ჩრდილოეთით მძვინვარე ხანძრები, რომელმაც ბოლო ინფორმაციით 65 ადამიანი იმსხვერპლა.
მაროკოში კვირის ბოლოსთვის 49 გრადუსს პროგნოზირებენ.
მეტეოროლოგების განცხადებით, ჰაერის რეკორდული ტემპერატურა აფრიკიდან წამოსული ანტიციკლონ "ლუციფერითაა" გამოწვეული.
პროგნოზის მიხედვით "ლუციფერი" კონტინენტური იტალიის გავლით ჩრდილოეთით მიემართება.
