რუსეთში კამჩატკის ტერიტორიაზე, კატასტროფა განიცადა ვერტმფრენმა Ми-8, რომელშიც 16 ადამიანი იმყოფებოდა.
გავრცელებული ინფორმაციით, ვერტმფრენი, რომელსაც მოსკოვიდან და სანქტ პეტერბურგიდან ტურისტები გადაჰყავდა, კურილის ტბაში ჩავარდა.
ბორტზე სულ 16 ადამიანი იმყოფებოდა. 13 მგზავრი და ეკიპაჟის სამი წევრი.
რუსეთის ცენტრალური ხელისუფლება გარდაცვლილთა ან გადარჩენილთა შესახებ ოფიციალურ კომენტარს არ აკეთებს.
რუსული სააგენტო "ინტერფაქსი" კი კამჩატკის რეგიონული ჯანდაცვის ცენტრის წყაროზე დაყრდნობით აცხადებს, რომ კატასტროფას 8 ადამიანი ემსხვერპლა.
"რვა ადამიანი გადაარჩინეს, მათ სიცოცხლეს საფრთხე არ ემუქრება. კიდევ რვა ადამიანი დაიღუპა. გარდაცვლილთა სხეულები სავარაუდოდ კურილის ტბის ფსკერზეა", - თქვა წყარომ.
როგორც იუწყებიან, დაზიანებული ვერტმფრენმა ტბაში ჩავარდნის შემდეგ, მალევე დაიწყო ჩაძირვა. ექვსმა მგზავრმა და ეკიპაჟის ორმა წევრმა კი შეძლო ვერტმფრენიდან გამოსვლა და ნაპირისკენ გაცურვა.
"ინტერფაქსის" ინფორმაციით, კატასტროფის მიზეზი სავარაუდოდ გახდა ძლიერი ნისლი, რამაც პილოტირების შეცდომა გამოიწვია.
ფაქტთან დაკავშირებით დაიწყო გამოძიება.
