დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორის მოადგილე პაატა იმნაძე აცხადებს, რომ ოლიმპიური ჩემპიონის [ლაშა ბექაური] გამარჯვების აღსანიშნავად გამართული ლხინი მისთვის მიუღებელი იყო. ამის შესახებ იმნაძემ "ტვ პირველის" ეთერში ისაუბრა.
ჟურნალისტის მიერ დასმულ შეკითხვაზე, აღნიშნულის გამო ხომ არ უსაყვედურებდა პრემიერ-მინისტრს, იმნაძემ უპასუხა:
"იცით რა, პრემიერიც ქართველია და ამ ქვეყნის პრემიერია. ოლიმპიური ჩემპიონი როცა არის… მესმის ყველაფერი. თუმცა, ჩემთვის მიუღებელი იყო ეს ყველაფერი ოლიმპიური ჩემპიონის შეხვედრაზეც ასეთი სუფრა. კი იყვნენ დისტანციურებულები მაქსიმალურად, მაგრამ ჩემთვის მაინც მიუღებელია", - ამბობს იმნაძე.
შეგახსენებთ, 7 აგვისტოს საქართველოს პრემიერ-მინისტრი ირაკლი ღარიბაშვილი ლაშა ბექაურის მშობლიურ სოფელ არხილოსკალოში ჩავიდა, სადაც ოლიმპიურ ჩემპიონს დახვედრა მოუწყვეს. სოციალურ ქსელში გავრცელებულ კადრებში ჩანს, რომ ღონისძიების მონაწილეთა შორის არ იყო დაცული სოციალური დისტანცირების რეგულაციები.
