საშუალოვადიან პერიოდში მშპ-ის ზრდის საშუალო წლიური მაჩვენებელი სავარაუდოდ 5.9 პროცენტის ფარგლებში იქნება. ამის შესახებ საუბარია საქართველოს მთავრობის ძირითადი მონაცემებისა და მიმართულებების დოკუმენტში, რომელიც 2011-2014 წლებს მოიცავს.
2010 წელს, წინა წელთან შედარებით, რეალური მთლიანი შიდა პროდუქტი სავარაუდოდ 5.5 პროცენტით გაიზრდება და ნომინალურ გამოხატულებაში 20.4 მლრდ ლარს გადააჭარბებს. საშუალოვადიან პერიოდში (2011-2014 წლები) მშპ-ის ზრდის საშუალო წლიური მაჩვენებელი, სავარაუდოდ, 5.9 პროცენტის ფარგლებში იქნება.
2010 წლის პირველ ნახვარში, წინა წლის შესაბამის პერიოდთან შედარებით, რეალური მთლიანი შიდა პროდუქტი (მშპ) 6.6%-ით გაიზარდა და ნომინალურ გამოხატულებაში 9.2 მლრდ ლარს გაუტოლდა. ზემოაღნიშნულის გათვალისწინებით, მშპ-ის რეალური ზრდის პროგნოზის კორექტირება მოხდა და 2010 წლისთვის მშპ-ის განახლებული პროგნოზი 5.5%-ს, ხოლო ნომინალური მშპ-ის პროგნოზი _ 20.5 მლრდ ლარს შეადგენს.
მშპ-ის ზრდაში ყველაზე მნიშვნელოვანი წვლილი შეიტანეს მრეწველობის, ვაჭრობისა და ტრანსპორტის დარგებმა. ამ დარგებმა განაპირობეს მშპ-ის 4.4%-ით ზრდა, რაც მთლიანი შიდა პროდუქტის საერთო ზრდის 66.7%-ს შეადგენს.
2010 წლის იანვარ-ივნისში, 2009 წლის შესაბამის პერიოდთან შედარებით წარმოების მოცულობის ყველაზე მეტი ზრდა დაფიქსირდა მრეწველობის, ტრანსპორტის, ვაჭრობის და მშენებლობის დარგებში. ამ დარგებში შექმნილი დამატებული ღირებულება გაიზარდა: მრეწველობაში _ 15.9%-ით, ტრანსპორტში _ 14.6%-ით, ვაჭრობაში _ 12.%-ით, მშენებლობაში _ 12.7%-ით.
საქართველოს მთავრობის ძირითადი მონაცემებისა და მიმართულებების დოკუმენტში ნათქვამია, რომ საშუალოვადიან პერიოდში ქვეყნის მაკროეკონომიკური პოლიტიკა მიმართული იქნება მაკროეკონომიკური სტაბილურობის უზრუნველყოფისკენ, რომლის მისაღწევად ძირითადი პრიორიტეტებია: კრიზისის შემდგომი პერიოდისთვის ეკონომიკის სტაბილიზაცია და მომდევნო ეტაპზე ეკონომიკის მდგრადი და მაღალი ტემპით ზრდა; ინფლაციის ერთნიშნა მაჩვენებლის შენარჩუნება და საინვესტიციო გარემოს შემდგომი გაუმჯობესება