მომდევნო ოთხი წლის განმავლობაში კერძო ინვესტიციებს ზრდის ტენდენცია ექნება და 2014 წლისთვის სავარაუდოდ მშპ-ის 31.6 პროცენტს შეადგენს. ამის შესახებ საუბარია საქართველოს მთავრობის ძირითადი მონაცემებისა და მიმართულებების დოკუმენტში, რომელიც 2011-2014 წლებს მოიცავს.
2010 წელს, 2009 წელთან შედარებით, კერძო ინვესტიციების მოსალოდნელი ნომინალური მოცულობა გაიზრდება და მშპ-ის 21.9 პროცენტს მიაღწევს.
საქართველოს მთავრობის ძირითადი მონაცემებისა და მიმართულებების დოკუმენტში ნათქვამია, რომ საშუალოვადიან პერიოდში ქვეყნის მაკროეკონომიკური პოლიტიკა მიმართული იქნება მაკროეკონომიკური სტაბილურობის უზრუნველყოფისაკენ, რომლის მისაღწევად ძირითადი პრიორიტეტებია: კრიზისის შემდგომი პერიოდისთვის ეკონომიკის სტაბილიზაცია და მომდევნო ეტაპზე ეკონომიკის მდგრადი და მაღალი ტემპით ზრდა; ინფლაციის ერთნიშნა მაჩვენებლის შენარჩუნება და საინვესტიციო გარემოს შემდგომი გაუმჯობესება.