ევროკომისარი ენერგეტიკის საკითხებში გიუნტერ ოტინგერი საქართველოს 2011 წლის გაზაფხულზე ეწვევა, ამის შესახებ საქართველოს სამთავრობო დელეგაციის ბრიუსელში ვიზიტისას გახდა ცნობილი.
საქართველოს დელეგაცია ბრიუსელში პრემიერ-მინისტრის ნიკა გილაურის ხელმძღვანელობითიმყოფებოდა, სადაც „საქართველოს ენერგეტიკული კონფერენცია" გაიმართა.
კონფერენციაში მონაწილეობას იღებდნენ ევროკომისარი ენერგეტიკის საკითხებში გიუნტერ ოტინგერი, საქართველოს ენერგეტიკის მინისტრი ალექსანდრე ხეთაგური, ევროკავშირის მაღალი დონის წარმომადგენლობა, სხვადასხვა საერთაშორისო ორგანიზაციები, კერძო კომპანიების წარმომადგენლები.
კონფერენციაზე პრემიერ-მინისტრის შემდეგ სიტყვით გამოვიდა ენერგეტიკის მინისტრი ალექსანდრე ხეთაგური, რომელმაც ისაუბრა ქვეყანაში არსებულ საინვესტიცო გარემოზე, ინვესტიციების მოზიდვის თვალსაზრისით ქვეყნის საკანონმდებლო და მარეგულირებელ ბაზაში განხორციელებულ ცვლილებებზე, რომლებიც ხეთაურის თქმით, ხელს შეუწყობს ინვესტიციების მოზიდვას საქართველოში. ასევე, ისაუბრა ამჟამად მიმდინარე პროექტებზე და საქართველოს ჰიდროენერგეტიკაში მცირე, საშუალო და მძლავრი ჰიდროელექტროსადგურების მშენებლობის პოტენციურ შესაძლებლობებზე. მინისტრმა კონფერენციის მონაწილეებს გააცნო ინფორმაცია საქართველოში მიმდინარე შავი ზღვის ელექტროგადამცემი ხაზის მშენებლობის მიმდინარეობაზე.
ევროკომისარმა ენერგეტიკის საკითხებში გიუნტერ ოტინგერმა, თავის გამოსვლაში კიდევ ერთხელ, ფართო საზოგადოების წინაშე ხაზი გაუსვა საქართველოს განსაკუთრებულ სტრატეგიულ და კონსტრუქციულ როლს სატრანზიტო ენერგეტიკული პროექტების განვითარების კუთხით, ამასთან მან მხარი დაუჭირა საქართველოს ევროკავშირის ბაზართან სრულ ინტეგრაციას ევროპის საკანონმდებლო ბაზასთან დაახლოების გზით. გიუნტერ ოტინგერმა განსაკუთრებით აღნიშნა ევროკავშირისა და საქართველოს თანამშრომლობა განახლებადი ენერგორესურსების განვითარების თვალსაზრისით.