"ევროკავშირმა საქართველო პირველად დაასახელა სტრატეგიულ პარტნიორად ენერგეტიკულ დარგში", - ამის შესახებ განცხადება დღეს პრემიერ-მინისტრმა ნიკა გილაურმა მისი ბრიუსელში ვიზიტის შეფასებისას გააკეთა.
პრემიერის განმარტებით, საქართველომ მონაწილეობა მიიღო ბრიუსელში გამართულ ენერგეტიკულ კონფერენციაში, სადაც ნათლად იყო წარმოდგენილი ასქართველოს ენერგოპოტენციალი.
"თუ აქამდე საქართველო ელექტროენერგიის იმპორტს ახორციელებდა თურქეთში, სომხეთში, აზერბაიჯანსა და რუსეთში, ახლა შესაძლებელია მოხდეს ელექტროენერგიის ექსპორტი უკვე ევროკავშირის ქვეყნებშიც, რაც თურქეთში ტრანზიტის შემდეგ მიიღწევა", - განაცხადა გილაურმა.
პრემიერ-მინისტრმა ხაზი გაუსვა იმასაც, რომ ევროკავშირმა საქართველო გაზის მიწოდების კუთხითაც მნიშვნელოვან პარტნიორად დაასახელა.
"საქართველო გაზის ტრანზიტის კუთხით ევროკავშირის სტრატეგიაში ჩაჯდა და იქ წარმოდგენილია როგორც ერთ ერთი მნიშვნელოვანი ტრანზიტორი ქვეყანა და ამ პროექტზე ევროკავშირი უკვე მუშაობს და გაზის მხრივ ახალ პროექტების დაფინანსებისთვის ევროკავშირიდან დამატებითი ინვესტიციები შემოვა", - განაცხადა ნიკა გილაურმა.
მან ასევე აღნიშნა ისიც, რომ ევროკავშირის ინვესტორები საქართველოში ჰესების მშენებლობითაც არიან დაინტერესებულნი.
